Bible in duytsche (Delftse bijbel 1477)

§ Ca .xxix

1

OP den man die den ghenen die hem berispt mit harden necken versmadet. sal hem comen haestich een veruaren: ende ghesontheit en sal hem niet volghen.

2

inder menichfoudicheit vander gherechtighen sal dat volc verblijden: mer als die nydighe heerscappie sal ontfaen. soe sal dat volc suchten.

3

Een man die vroetscap mint hi verblijt sijnen vader: mer die lichte wijuen voet hi verliest sijn guet.

4

Een gherechtich coninc verheffet dat lant: die vracke man salt verderuen.

5

Een man die mit sachten ende gheuensden reden sijnen vrient toe spreect: hi spreit een nette tot sijnen voetstappen.

6

Den nidighen man die sondicht. sal een stricke bewinden: ende die gerechte salmen louen ende verblijden.

7

Die gherechtighe bekent der armer sake: mer die quade en weet gheen conste.

8

Ouerdadighe menschen schenden een stat. Mer die vroede keren die gramscap of.

9

Ist dat die wise man scheldet mit enen sotte: weder hi wort vertorent of lachet hi en sal gheen ruste vinden

10

Sondighe mannen haten die simpele mer die gherechte soken sijne ziele.

11

Een sotte brenget al sijnen geest voert mer een vroede draechtet ouer ende houten teghen namaels.

12

Een prince die gaerne hoert woerden der loghenen: hi heuet al nydighe dyenres.

13

Die arme ende die ghelouer die men sculdich is. si ghemoeten elc den anderen: die here is des eens ende des anders verlichter.

14

Een coninc die die arme oerdeelt in waerheiden: sijn troen sal ewelijc vast ghemaect worden.

15

Die rueden ende die berispinge gheuen vroetscap: mer een kint datmen laet tot sijnen wille verderft sijn moeder

16

Ende in die menichfoudicheit vanden quaden sullen die quaetheden ghemenichfoudicht worden: ende die gherechte sullen haer vallen sien.

17

Leer dijn kint ende het sal dij verkuelen: ende het sal gheuen weelde dijnre zielen.

18

Als die prophecie ghebreken sal so sal dat volc worden ghescheiden: mer die die wet wacht hi is salich.

19

Men en mach enen knecht mit woerden niet leren: want hi verstaet dattu segghes: ende hi versmaet te antwoerden.

20

Saechstu enen mensche die snelle was te spreken. het is meer te hopen sotheit dan sijn berispen.

21

Die sijn knecht van sijnre kintsheit verweendelijc voet: hi sallen daer na houaerdich vinden.

22

Een vertorent man verporret sceldinghe: ende die licht is te verbelghen. hi sal nederheldiger sijn ten sonden.

23

Den houaerdighen volghet vernedertheit: ende die oetmoedich van gheeste is die sal die glorie ontfaen.

24

Die deelachtich mit enen dief is die haet sijn ziele: hi hoert den ghenen die hem besweert: ende en

[p. *239]

wistes niet.

25

Die den menschen ontsiet hi sal haestelijc vallen: die inden here hoopt hi sal worden verheuen.

26

Veel luden besoken des princen aenschijn: ende elker oerdeel comt wt vanden here.

27

Die gerechtighe veronwaerden den nydighen man: ende die nydighe veronwaerden den ghenen die inden rechten weghe sijn. Een kint dat dat woert des vaders wacht: sal buyten verliesen sijn.