Bible in duytsche (Delftse bijbel 1477)

§ Ca .xxviij

1

DIe quade vliecht als hem niemant en iaecht: mer die gherechtighe sal betrouwen als een leeu ende sonder anxt sijn.

2

Om die sonde vanden lande sijn haer princen veel: ende om der menschen wijsheit. ende om die const der dinghen diemen seit. so sal eens hertogen leuen te langher sijn.

3

Een arm mensche die arme luden ouerdaet doet: hi is ghelijc groten reghen daer die honger in bereet wort.

4

Die die wet laten si prisen die quaden: diese wachten sullen worden verwarmt teghen hem.

5

Quade mannen en pensen gheen oerdel: mer die den here soken merken alle dinc.

6

Beter is een arm man wanderende in sijnre simpelheit: dan die rike in quaden weghen.

7

Die de wet wacht is een vroet kint: mer die leckers voedet hi verdoemt sinen vader.

8

Die rijcheit te gader hopet met woker ende mit vryer woker: hi vergadertse inden armen?

9

Die sijn oren neder neyghet: dat hi die wet niet en horet: sijn bedinge sal sijn te veronwaerden.

10

Die die gherechtighe bedriecht inden quaden wech hi sal in sijn vervaren vallen: ende die simpele sullen sijn guet besitten.

11

Een rijc man dunct hemseluen vroet: mer die wijse arme sallen merken.

12

Vele glorien is inder gherechtigher verheffen: mer als die quade regneren soe sijn der menschen vallen

13

Die sijn misdaet berget hi en sal niet worden gherecht: mer diese belijt ende diese laet hi sal ontfermicheit beiagen

14

Salich is die mensche die altoes vresende is: mer die van harder ghedachte is: hi sal in quaet vallen.

15

Een briesschende leeu ende een hongherighen beer: is een nydich prince bouen arm volc.

16

Een leidsman die wijsheit ghebreect verduwet veel luden bij ouercracht: mer die vrecheit haet. sine daghen sullen lanc worden.

17

Een mensche die ouercracht doet eenre zielen: nyemant en sal sijn bluet ghedoghen al vloghe hi tot enen put.

18

Die simpelijc wandert sal behouden wesen: mer die mit verkeerden weghen in comt hi sal eenwarf vallen.

19

Die sijn lant bouwet. hi sal worden ghesadet van brode: die ledicheit volghet. hij sal worden veruolt mit ghebrec.

20

Mer loeft seer enen ghetrouwen man mer die hem haest rijc te worden. en sal niet onnosel wesen.

21

Die inden oerdel een aenschijn bekent hi en doet niet wel: want hij laet oeck om een brocke broots die waerheit

22

Een man die haest rijc te worden ende een ander benidet: hi en weet niet dat die armoede tot hem comen sal.

23

Die den mensche berispt: hi sal daer na gracie vinden voer hem. meer dan die ghene diene bedrieghet bider smekinge vander tonghe.

24

Die yet steelt van sijnre moeder ende seit dattet gheen sonde en is: hi is manslacht deelachtich

25

Die hem beroemt ende breet maect. die

[p. *238]

ruert twistinghe: mer die inden here hoept hi sal worden behouden.

26

Die in sijn herte betrouwet hi is een sot: mer die wijselijc wandert hi sal worden ghesalicht.

27

Die den armen gheeft hem en sal niet ghebreken: die den bidder versmaet hi sal ghebrec doghen.

28

Als die quade sullen opstaen. so sullen die menschen worden verborghen: ende als die veruaren. soe sullen die gherechtighe ghemenichfoudicht worden.