Bible in duytsche (Delftse bijbel 1477)

§ Capittel .xxvi.

1

ALsoe die snee is inden somer ende die reghen inden ouxt: alsoe onbetaemt is enen sotten glorie.

2

Want ghelijc dat een voghel oueruliecht totten hoghen: ende ghelijc dat die mossche allesins gaet: alsoe sal die vloec op yemant ghebeden te vergheefs op hem comen.

3

Een gheesel te paerde. ende een helfter ten ezel: ende een ruede ter onwiser rugghe.

4

En wilt niet antwoerden den sot na sine sotheit: dattu niet en werdes sijns ghelijc.

5

Ende antwoerde den sot na sine sotheit: dat hem seluen niet en duncke dat hij vroet is.

6

Hij is crepel mitten voeten ende drinct quaetheit: die woerden sendet bi enen sotten bode

7

Ghelijc dat een crepel te vergeefs scone benen heeft: alsoe onbetaem is parabole inder sotten mont

8

Ghelijc een die enen steen werpt in enen hoop van stenen: also is die ghene die den sotten ere geeft.

9

Gelijke of een doerne wiesse in eens dronckens hant: also is die parabole inder sotten mont.

10

Dat vonnisse eindet die saken: ende die den sotten dat swighen inset. hi sachtet die gramscap.

11

Gelijc den hont die daer wederkeert tot sinen spuwen dat hi wtgheworpen heeft: alsoe is die onwise die sijn sotheit weder duet.

12

Hebstu gesien enen mensche die hem seluen vroet dunct: die sotte sal meer hopen hebben dan.

13

Die traghe seit die leeu is inden wege: ende die leeuinne inder straten.

14

Gelijc dat die dore keert in haer herre: also wendet hem die traghe in sijn bedde.

15

die traghe berghet sijn handen onder sijn ocselen: ende tes hem pine dat hijse steect tot sinen monde waert.

16

Die sotte dunct hem seluen vroeder: dan seuen mannen ende die oerdel spreken.

17

Ghelijc den genen die enen hont begrijpt mitten oren: also is die ghene die ouerlidet ende ongedoechsaem hem seluen menget mit eens anders gheschelde.

18

Ghelijc dat misdadich is die ghene die speren ende scutte scietet om te doden:

19

also is enen man die boeslijc deert sinen vrient: ende als hi begrepen sal worden soe sal hi segghen ic deet in spot.

20

Alst hout ghebreken sal. so salt vier wtgaen: als die murmeracie ghedaen sal wesen. so sullen die twistinghe gherusten.

21

Ghelijc als die dode cole verwecket ten brande ende thout ten vieren: also verwect een toornich mensche twistinghe.

22

Eens achtersprekers woerden sijn of si simpel waren: ende si comen totten binnensten vanden buke.

23

Ghelijc oftu woudeste ouertrecken een aerden vat mit vulen siluer: also sijn die opgheblasen lippen die geuoecht sijn mit alte quader herten

24

Men verstaet den viant bi sijnen lippen: als hij quaetheit heeft ghepenst in sijnre herten.

25

Wanneer hi sijn stemme laet

[p. *236]

dalen of sachtelijc neder spreect soe en gheloue hem niet: want in sijn herte sijn seuen quaetheden.

26

Die bedrieghelic die hatye bedect: sine quaetheit sal worden gheopenbaert inden rade.

27

Die ene gracht graeft hi salre in vallen: ende die enen steen wentelt hi sal weder tot hem keren.

28

Een bedrieghende tonghe en mint die waerheit niet: een vule mont verwect die val