Bible in duytsche (Delftse bijbel 1477)
(2008)–Anoniem Bible in duytsche (Delftse bijbel 1477)–
Auteursrechtelijk beschermd1[25:2]GOds glorie is twoert te helen: ende der coninghen glorie is die redene te ondersoken | |
2[25:3]Die hemel is bouen ende die aerde is beneden: ende der coninghen herten en machmen niet ondersoken. | |
3[25:4]Doet die roesticheit vanden siluer: so salre alten puren vat of comen | |
4[25:5]Doe die wreetheit van des conincs aenschijn: ende sijn thoren sal vast gemaect worden mit gherechticheit. | |
5[25:6]En openbaer di niet glorioes voerden coninc: ende en staet niet inder groter luden stede. | |
6[25:7]Want het is beter dat dij gheseit wort coemt harwaert op: dan dattu wordes vernedert voerden prince. Dat dijn oghen hebben ghesien | |
7[25:8]dat en brenghe niet lichtelijc voert in sceldinghe dattu daer na niet en sulste mogen verbeteren alstu dinen vrient hebste lachter ghedaen. | |
8[25:9]Vertelle dine saken met dinen vrient. ende die verholen dinghen en ondecke nyemant van buten: | |
9[25:10]dat hijt di niet lichtelijc en verwite als hijt heeft ghehoert: ende dat hi niet op en houde di te lachteren. Gracie ende vrientscap die verlossen: die suldi bewaren: dattu niet berispelijc en werdes. | |
10[25:11]Gulden appelen in silueren bedden: is die dat woert spreect in sinen tiden | |
11[25:12]Het is een gulden inaure ende een blenckende paerle: die berispet enen wijsen ende die ghehoersaem oren. | |
12[25:13]Ghelijc den coude vander snee inden daghen des ouxten: also is die ghetrouwe bode den genen dien ghesent heeft: hi sal sijn ziel doen rusten. | |
13[25:14]Wolken ende wint. ende en gheen reghen daer na volghende: alsoe is een glorioes die sine beloften niet en voldoet. | |
14[25:15]Ghedoechsaemheit sal den prince sachten: ende een morwe tonge verbrect herdicheit. | |
15[25:16]Du hebste honich geuonden etet datti ghenoecht: dattu niet licht en spuwes alstu versadet biste. | |
16[25:17]Trect of dijn voet van dijns naestens huis: dat hi di lichte niet en hatet als hijs gesadet is | |
17[25:18]Gescutte ende zwaert ende een scarp scut: is die mensche die tegen sinen naesten spreect valsche getuge | |
18[25:19]Een vuylen tant ende een moede voet. is die gene die ghetrouwen op enen ongetrouwen inden daghe des verdriets: ende hi verliest sinen mantel in midden der coude. | |
19[25:20]Edic in nytro: is die gene die liedekijns singhet mit eenre quader herten Ghelijc dat die motte den clederen ende die wormen den houte deert: also deert eens mans zericheit der herten. | |
20[25:21]Ist dat dijn viant hongher heeft so gheeft hem teten: ist dat hem dorst ghif hem born te drincken. | |
21[25:22]Want du sulste dus bernende colen vergaderen op sijn hooft: ende die here salt di weder gelden. | |
22[25:23]Die wint vanden noorden scheidet den reghen: ende een drouich aensicht scheidet een achtersprekende tonge. | |
23[25:24]Het is beter te sitten in enen hoeck van enen wtlaet: dan mit enen scheldachtighen wiue. ende in een ghemeen huus. | |
24[25:25]Couden borne der zielen die dorst: ende een guet bode van verren lande. | |
25[25:26]Ende ene fonteyne gestoort | |
[pagina *235]
| |
mitten voeten ende ghescoerde adere: is die gherechtighe die valt doer enen quaden. | |
26[25:27]Gelijc den ghenen die honich niet guet en is dies te veel eet: also sal die ghene worden verdrucket vander glorien die ondersoker is vanderghenaden gods. | |
27[25:28]Gheliken eenre stat die openbaer ende sonder ommeganc van muren is: alsoe is enen man die sinen gheest niet en mach bedwinghen in dat spreken |
|