Bible in duytsche (Delftse bijbel 1477)

§ Capittel .xxiiij.

1

QUade mannen en volghe niet noch en beghere niet mit hem te sijn:

2

want haer ghedachten pensen roue: ende haer lippen spreken boesheden

3[24:10]

Ist dattu moede mishopes so sal inden daghe dijns verdriets dijn starcheit

[p. *233]

worden gemindert

4[24:3]

Mit vroetscappen salmen een huys stichten: ende mit wijsheden salment starc maken.

5[24:4]

Die kelrers sullen worden veruolt mit leringhe: mit alrehande preciose ende alte schone goede

6[24:5]

Een vroedt man is starc. ende een gheleert man is crachtich. ende vermoghende:

7[24:6]

want mit besetheden ontgaetmen enen strijt: ende salicheit sal sijn daer veel raden sijn.

8[24:7]

Den sotten is wijsheit hoghe: hi en sal sijn mont niet opdoen inder poorten.

9[24:8]

Die penst altoes quade dinghen te doen: men sallen sot heten.

10[24:9]

Eens sots ghepens is sonde: ende tsmenschen veronwaerden is een achter spreker.

11

Verlosse die gene die men ter doot waert leidet: houde niet op te verlossen die gene diemen trect ter verderfnisse waert.

12

Ist dattu segghes mijn crachten die en vermogens niet: die insyenre is vander herten hi verstatet. ende bedrieghe niet den behouder dijnre zielen: ende hi sal den mensche gelden na sijnen werken.

13

Kint mijn eet honich want tis guet: ende die honichrote is alte suete dijnre kelen.

14

Also moet oec sijn die leringhe der wijsheit dijnre zielen: alstu die gheuonden hebste so sulstuse hebben inden lesten hope: ende dijn hope en sal niet veruaren.

15

En legt niet lagen noch en soect gheen quaet in des gerechtighen huys: noch en woeste sijn ruste niet.

16

Want die gherechtighe sal seuen warue vallen inden daghe. ende weder opstaen: ende die boese sullen vallen int quade.

17

Ende verblijde dij niet als dijn viant gheuallen is: ende dijn herte en verblijde niet in sijnen val:

18

dattet licht die here niet en sie ende dattet hem mishaghe: ende dat hi dan sijn gramscap van hem doe.

19

Schelde niet mit alten quaden mensche. noch en volghe den onghenadighen niet nae mitten werken:

20

want die quade en hebben gheen hope van dien dat toecomende is: ende der nydigher claerheit sal worden gheblusschet.

21

Kint mijn ontsie den here ende den coninc: ende mitten achtersprekers en menghe di niet

22

Want haer verlies sal haestelic opstaen: wie bekent des eens ende des anders val?

23

dese dinghen behoren oec den vroeden. Enen persoen te kennen inden oerdel en is niet guet.

24

Die den quaden seit du biste gherechtich. dat volc sallen vloken: ende gheslachte sullen hem lachteren

25

Die ghene diese berispen. sullen worden gheprijst: ende die benedictie sal op hem comen.

26

Hi sal die lippen cussen. die rechte woerden antwoert.

27

Bereide dijn werc daer buten: ende aernstelijc oeffene dinen acker: ende daer na so sulstu dijn huys stichten.

28

Wes niet te vergeefs getughe teghen dinen naesten: noch en smeke niet mit dinen lippen.

29

Segt niet also hi mi heeft ghedaen also sal ic hem doen: ic sal elken wederghelden na sijn werck.

30

Ic leet doer eens traghen menschen acker: ende doer eens sots mans wijngaert.

31

Ende sich netelen haddent al veruolt: ende die doornen hadden dat bouenste daer of bedect: ende die beheyninghe vanden stenen was te broken.

32

Als ic dit al ghesien hadde so set ict in mijnre herten: ende mit exempelen leerdic discipline.

33

Trage hoe langhe slaeps-

[p. *234]

tu hoe en staetstu niet op vanden slaep? Du sulste oec luttel slapen ende luttel vakeren: luttel sulstu die handen te gader vouwen om te rusten.

34

ende dijn gebrec sal comen als een loper: ende armoede als een ghewapent man