Bible in duytsche (Delftse bijbel 1477)

§ Ca .xxij

1

EEn gueden naem. is beter dan veel rijcheden: ende guede gracie is bouen gout ende siluer.

2

Die rike ende die arme quamen onderlinghe te ghemoet: die here is werker van beiden.

3

Die behendighe sach dat quaet ende hi berghede hem: die onnosel leet ouer ende wort gequetst mit scaden.

4

Dat eynde vander gemaniertheit is des heren vrese: rijcheit glorie ende leuen

5

Mer wapenen ende zwaerden in eens houaerdichs menschen wech: mer die wachter haerre zielen sal verre gaen van hem.

6

Het is een spot enen ionghelinc neuen sinen wech: oec als hi out geworden sal sijn. en sal hi der niet afgaen.

7

Die rike ghebiet den armen: mer die ontleent: is des wokenaers knecht.

8

Die quaetheit sayt sal quaetheit ouxten: ende hi sal worden verteert miter roede sijnre

[p. *231]

gramscap.

9

Die totter ontfermherticheit bereit is hi sal worden gebenedijt: want hi gaf den armen van sijnen brode Die ghiften gheeft die sal vecrighen victorie ende eer: mer hi sal wech doen der geenre zielen diese ontfaen.

10

Werpt wt den bespotter: ende die twistinghe sal mit hem wtgaen: ende die saken ende die lachteren sullen ophouden.

11

Die minnet die suuerheit der herten: om die gracie van sijnen lippen soe sal hi den coninc te vriende hebben.

12

Des heren oghen wachten die const: ende des ongherechtichs woerden worden onder ghetreden.

13

Die trage seit. die leeu is daer buyten: ic sal worden ghedoot int midden der straten.

14

Eens vreemdes wijfs mont is een diepe graft: soe wien dattie here gram is hi sal in haer vallen.

15

Die sotheit is gebonden in een kints herte: ende een ruede der discipline salse veriaghen.

16

Die den armen menschen ouercracht doet om dat hi sijn rijcheit wil meerren: hi salse gheuen enen rijckeren ende sal selue gebrec hebben.

17

Kint mijn. neyghen dijn oren: ende hore der vroeder woerden. Ende sette dijn herte tot mijnre leringhe:

18

die welke schone sal sijn alstuse ghehouden hebste in dijn herte. Ende si sal oueruloeyen in dijnen lippen:

19

dat in den here si dijn betrouwen. Waer bi dat icse dij huden getoent hebbe

20

Sich ic hebse di drieuoudelijc bescreuen inden gepense ende inder consten:

21

om dat ic dij soude thonen die vasticheit ende die sprake der waerheit: hier of te antwoerden den ghenen die di senden.

22

En doet den armen gheen onrecht om dat sij arm sijn: noch en verduwet die mate niet inden poorten:

23

want die here sal sijn saken oerdelen: ende hi sal die ghene doersteken die sine ziele doerstaken.

24

En wilt gheens grams menschen vrient sijn. noch en wander niet mit ghenen verwoeden man:

25

dattu licht sijn weghen niet en leerste: ende scande neemste dijnre zielen

26

Wilt niet wesen mitten ghenen die haer handen ontdoen: ende die hem seluen te pande offeren voer scoude

27

Want oftu niet en hebstu daer du of moges betalen: wat sake ist dat hi nemet dat ouerdecsel van dijnen bedde?

28

Ganc die oude termine niet ouer: die dijn vaders gheset hebben

29

Saechstu enen snellen man in sinen wercken: hi sal staen voer die coninghen ende hi en sal voer die oneedele niet sijn