Bible in duytsche (Delftse bijbel 1477)

§ Ca .xxi.

1

GHelijc scheidinghe van wateren also is des conincs herte in des heren hant: soe warwaert hi willen sal so sal hi dat neyghen.

2

Alle mans weghen duncken hem seluen recht: mer die here weghet die herten.

3

Ontfermicheit ende oerdeel te doen: ghenoecht meer den here dan victimen.

4

Tferheffen vanden oghen is dat verbreden vander herten: ende der boser claerheit is sonde.

5

Eens vroems ghepens sijn altoes in oueruloedicheit: mer elc traghe is altoes in ghebreken.

6

Die scat vergadert mitter tonghe der loghenen hi is ydel ende verwoet: ende hi sal worden gheuaen ten stricke vander doot.

7

Der quader roue sullen hem neder trecken: want si en wouden gheen oerdele doen

8

Eens mans verkeert wech is vreemde van gode mer die suuer is hi doet gerecht werc

[p. *230]

9

Beter ist te sitten in een hoock vanden dake: dan mit enen kijfachtighen wijue ende in een gemeen huys.

10

Des boeses ziele begheert quaet: hi en sal niet ontfermen sijn naesten.

11

Die cleyne sal vroeder wesen dan die verdoemt ouerdadighe: ende ist dat hi der vroetscap volghet so sal hi conste nemen.

12

Die gerechtighe voerpeinst van des quaets huys: om dat hi den nidighen vant quade trecken sal.

13

Die sijn oren stopt iegens des arms menschen roep: hi sal oec copen ende men en sals noet horen.

14

Verburghen ghift lesschet die gramscap: ende die ghifte inden scoot lesschet alte grote onwaerdicheit.

15

Den gherechtighen is blijscap vonnisse te doen: ende den genen die quaet doen is vreese.

16

Een man die dwaelt vanden weghe der leringe: hi sal wonen inder vergaderinge van den giganten.

17

Die die werscepen mint hi sal in ghebreken sijn: die die wijn ende vette dinghen mint hi en sal niet rijc werden.

18

Men sal den nydigen voerden gherechtighen gheuen: ende voerden gherechten den ongherechten.

19

Het is beter te wonen in een woest lant: dan mit enen scheldende ende toernighen wiue.

20

Een begheerlike stat ende olye is in des gherechten woninge: ende een onvroet man hi scheidet dat.

21

Die der gherechticheit ende der ontfermherticheit volghet: hi sal vinden dat leuen ende rechtuaerdicheit ende glorie.

22

Die wijse ghinc op inder starcker stat: ende hi destrueerde die starcheit haerre betrouwenisse

23

Die sinen mont ende sine tonghe wacht hi hoedet sine ziele van quellinge.

24

Die houaerdighe ende die hoochdraghende hiet ongheleert: die in gramscap houaerdicheit werct.

25

die begeerten doden den traghen: want sijn handen en wouden niet werken.

26

Die quade. begheert ende wenschet alden dach: mer die gerechtich is. hi deylt ende niet op en houdet

27

Der quader offer sijn te veronwaerden: die worden gheoffert wt misdaden.

28

Een loghenachtich ghetuych sal veruaren: een gehoersaem man sal victorie spreken.

29

Een nydighe. verhart scalckelijc sijn aensicht: mer die gerechtich is verbetert sinen wech.

30

Gheen vroetscap. noch gheen wijsheit: noch gheen raet en is teghens gode.

31

Dat paert is bereet teghen den dach vanden stride: mer die here sal die salicheit geuen