Bible in duytsche (Delftse bijbel 1477)

§ Ca xvij

1

BEter is een droghe brocke mit bliscappen: dan een huys vol offerhanden mit gekijf.

2

Een wijs knecht sal heerscappie hebben ouer sotte kinderen: ende hi sal derfachtich-

[p. *226]

eit delen tusschen ghebruederen.

3

Also dat siluer geproeft wort mitten viere ende dat gout inden ouen: alsoe prouet die here die herten.

4

Die quade is ghehoersaem der ongherechtigher tonge: ende die bose hoert na loghenachtighe lippen.

5

Die den armen versmaet hi lastert sijnen maker: ende die hem verblijt in eens anders val: en sal niet onghecastijt bliuen.

6

Der ouder cronen sijn hare kinderen: ende der kinderen glorie sijn haers vaders.

7

Den sotten en betamen niet besmette woerden: noch enen prince lieghende lippen.

8

Alte bequame gemme is tonbeiden eens ontbeiders: soe warwaert hij hem keert hij verstaet vroedelijc.

9

Die die misdaet heelt hij soect vrientscap: mer die verseit met anderen redenen hi verscheidet die tegader versellet sijn.

10

Meer werct een berispen anden vroeden: dan hondert wonden anden sotten

11

Die quade soect altoes ghestrijt: mer een fel engel sal teghen hem ghesent worden.

12

Het is beter te ghemoete te comen eenre berynne dier welpen dat gheuaen sijn dan enen sot die betrouwen heeft in sine sotheit.

13

Die gheldet tquaet voer guet: tquaet en sal van hem niet gaen

14

Die twater latet hi is thoeft van ghescelde: ende eer hi lachter ghedoocht hi latet tfonnisse.

15

Ende die den quaden gherecht wil maken ende die den gerechten veroerdelt: si sijn beide te veronwaerden van gode.

16

Wat vordert dat den sotten dat hi rijcheden heeft: als hi wijsheit niet copen en mach? Die sijn huys hoge maect hij soect den val ende die scuwet te leren sal int quade vallen.

17

Tot allen tiden mint hi die vrient is: ende den brueder wort geprooft inden liden

18

Een sot mensche slaet die handen te gader: als hi belofte ghedaen heeft voer sinen vrient.

19

Die penst om onruste die mint sceldinghe: ende die sinen mont hoghe heft die soect den val.

20

Die van verkeerden herten is hij en sal gheen guet vinden: ende die sijn tonghe keert hi sal inden quaden vallen.

21

Die sot is gheboren tot sijnre scanden: mer oec en sal die vader inden sot niet worden verblijt.

22

Een verblidende moet maect een groeyende outheit: mer die drouige gheest verdroget die beenren.

23

Die onghenadighe ontfaet die giften wt den scoot: om te verkeren die weghen des vonnissen.

24

In eens vroeden menschen aensichte lichtet die wijsheit: der sotter oghen sijn in die eynden der aerden.

25

Des vaders gramscap is die sotte soen ende rouwe der moeder dien drooch.

26

Ten is niet guet den gerechtighen scade aen te brenghen: noch den prince te slaen die rechte vonnist.

27

Die sijn woerden maniert hi is geleert ende vroet: ende die gheleerden man is van preciosen gheeste.

28

Die sot is dat hij swijcht men sallen voer wijs houden: ende luuct hi sijn lippen voerden verstandel