Bible in duytsche (Delftse bijbel 1477)

§ Ca .xiiij.

1

EEn wijs wijf sticht haer huus: mer dat onwijse wijf sal mitten handen haer eighen huys dat ghemaect is breken.

2

Soe wie in rechten weghe wandert ende gode ontsiet: hi wort versmaet van dien die gaet alden scandeliken wech.

3

In een sots mont is die ruede van houaerdicheden: mer der wijser lippen die wachtese.

4

Daer gheen ossen en sijn daer is die cribbe ydel: mer daer veel corens is daer is openbaer des ossen cracht.

5

Een ghetrouwe oerconde en sal niet lieghen: mer die bose oerconde brenghet loghen voert:

6

die bespotter soect wijsheit ende hi en vintse niet: der wijser leringhe is licht.

7

Nu ganc teghen enen sotten man: ende hij en weet niet die lippen der wijsheit.

8

Een scalcx wijsheit is te uerstaen sijnen wech: ende der sotten onwijshede is dolende.

9

Die sotte bespottet die sonde: ende tusschen die gherechtighe sal gracie bliuen.

10

Een herte dat bekent die bitterheit sijnre zielen: in sijn blijscap en sal niemant van buyten menghen.

11

Der onghenadigher huys sal worden ofghedaen: mer der gherechtigher woninghe sullen groeyen.

12

Want het is een wech die den mensche rechtuaerdich dunct: mer sijn leste. leiden totter dootwaert.

13

Dat lachen sal mit rouwen ghemenghet worden: ende dat eynde der blijscappen becommert mit screyen.

14

Die sot sal worden veruollet van sinen weghen: ende bouen hem sal wesen een guet man

15

Die on-

[p. *223]

nosel gheloeft elke woerden: mer die behendige merket sijn toepaden. Die bedriechlike soon en sal niet guets wesen: mer des wise knechts werken sullen geluckich wesen: ende sijn wech sal gerecht werden.

16

Die wise ontsiet ende keert hem vanden quaden: die sotte springet ouer ende betrouwet.

17

Die ongedoechsaem sal werken sotheit: ende die scalke man sal te haten wesen.

18

Die cleine sullen besitten die sotheit: ende die behendige sullen ontbeiden wetenheit.

19

Die quade sullen legghen voer die guede: ende die onghenadighe voer der gherechtigher poorten.

20

Die arme sal oec ghehaet wesen van sijnen naesten: mer der rijker vrienden sijn veel.

21

Die sinen naesten versmaet hi sondicht: mer die des arms ontfermt hi sal salich wesen

22

Die inden here gheloeft hi mint ontfermicheit: si dwalen die quaet werken Ontfermicheit ende waerheit bereiden guet.

23

In allen gueden werken sal sijn oueruloedicheit: mer daer veel woerden sijn. daer is dicwil ghebrec.

24

Der wijser cronen sijn haer rijcheden: die dwaesheit der sotten is onwijsheit

25

Ende een ghetrouwe ghetughe verlost die ziele: ende die bedrieger die brenct loghen voert.

26

In des heren vrese is betrouwen der starcheit: ende sinen sonen sal hope sijn.

27

Des heren vrese is fonteyne des leuens: ende ofkeert vanden val des doots

28

In die menichte vanden volke is des conincs waerdicheit: ende in luttel volcs is der princen lachter.

29

Die ghedoechsaem is hi beleit veel mit wijsheden: mer die onghedoechsaem is hi verheft sijn sotheit.

30

Die ghesontheit des herten is des vleyschs leuen: ende die vuylheit der beenre is hatye.

31

Die den maten ouerdaet doet hi veronwaert sinen scepper: mer die eerten die eens arms menschen ontfermt.

32

Die onghenadige sal wtgestoten worden in sijnre quaetheit: mer die gherechtighe hoopt in sijn doot.

33

In eens vroet mans herte sal die wijsheit rusten: ende hi sal die ongheleerde leren.

34

Die gherechticheit verheft den volke. mer die sonden maect die luden catijf.

35

Een verstandel dienre is den coninc bequaem: ende die onnutte sal sijn gramscap ghedoghen.