Bible in duytsche (Delftse bijbel 1477)

§ Ca .xiij.

1

EEn wijse soon is der vader leringhe: mer die een bespotter is hi en hoert des niet alsmen beryspt.

2

Vander vruchts sijns monts sal een mensche worden veruolt mit guede: mer der ouerdadigher zielen is ongherechtich

3

Die wacht sijnen mont hi behuet sine ziel: mer die onmerkende is in te spreken sal quaet gheuoelen.

4

Die traghe wil ende en wil niet: mer der gheenre ziel die wercken. sal vet worden.

5

Die gherechtighe veronwaert dat logenachtighe woert: mer die ongenadige bescaemt ende hi sal worden bescaemt.

6

Gherechticheit behuet des onnosels wech: mer onghenadicheit ondertredet den sondaren.

7

Enich is als of hi rijc waer al en heeft hi niet: ende sommich is als of hij arm waer al is hij in veel rijcheden

8

Tuerlossen eens mans ziele sijn sijn rijcheden: mer die arm is hi en ghedoecht niet berispinghe.

9

Der gherechtigher lichte verblidet: mer der ongenadigher licht sal worden geblusschet

10

Tusshen die houaerdighe sijn altoes striden: mer die alle dinc mit rade doet worden geregeert mit wijsheden.

11

Goet dat haestelijc an comt sal worden ghe-

[p. *222]

minret: mer datmen allencken vergadert mitter hant. dat sal worden ghemenichfoudicht.

12

Die hope die verlenct wort quellet die ziele: mer comende begheerte is hout des leuens.

13

Die enich dinc lachtert. hi verbindet hem seluen daerna: mer die dat ghebot ontsiet hi sal in vreden wanderen. Der boser zielen sullen dwalen in sonden: mer enen wisen knecht sullen sijn werken verspoedich sijn ende sijn wech sal worden beleidet

14

Eens wijs mans wet is fonteyn des leuens: dat hi ofkere vander doot val.

15

Guede leringhe sal gheuen gracie: inder versmadenre wech is dolinghe.

16

Die behendighe duet alle dinghe mit rade: mer die sot is. hi sal die sotheit op doen.

17

Eens onghenadichs bode sal vallen in quaet: mer een ghetrouwe legaet is gesontheit.

18

Armoede ende scande sal hem wesen die discipline laet: mer die gehoersam is den ghenen dien berispt hi sal worden verheuen.

19

Een begheerte die voldaen wort verblidet die ziel: mer die sotten veronwaerden den ghenen die quaet scuwen.

20

Die mitten wisen wandert hi sal wijs worden: der sotten vrient sal hem ghelijc worden

21

Den sondaren volghet dat quaet na: ende den gherechtighen sal dat guet ghehouden worden.

22

Die guede sal laten erfghenoten sinen kinderen ende sijnen neuen: ende den gherechtighen wort des sonders guet gehouden.

23

Vele spisen sijn inder vader nuwe landen: ende si worden ten anderen vergadert sonder vonnisse.

24

Die die ruede spaert die haet sijn kint: mer diet mint leertet naerstelijc.

25

Die gherechtighe die eet. ende veruollet sijn ziele: mer die onghenadigher buuc is onghesadelijc.