Bible in duytsche (Delftse bijbel 1477)

§ Ca .xi.

1

EEn lose waghe is een onwaerde voer gode: ende dat gherechte ghewichte is sijn wille.

2

Soe waer houerdie is daer sal oec wesen lachter: mer daer oetmoedicheit is daer sal wesen wijsheit.

3

Der gerechtiger simpelheit salse beleiden: ende der verkeerder ganghen salse woesten.

4

Inden daghe der wraken en sullen rijcheden niet profiten: mer die gherechticheit sal verlossen vander doot.

5

Eens simpels gherechticheit sal sinen wech beleiden: ende die onghenadighe sal vallen in sine ongenadicheit

6

Der gherechtigher gherechticheit sal die verlossen: ende die ongherechtighe sullen worden geuaen in hare verradenisse.

7

Als die onghenadighe mensche doot is so en sal sijns voertmeer gheen hope wesen: ende der besorchder ontbeiden sal veruaren.

8

Die gherechtighe is verlost van pijnen: ende die onghenadighe sal hem ouergheleuert worden ouer hem..

9

die gheueynsde mitten monde hi bedrieghet sinen vrient: mer die gherechtige sullen worden verlost mit wetenheit.

10

Een stat sal uerblijden inder gherechtigen guet: ende in tverlies der ongerechtiger sal wesen sijn last.

11

Mitter gerechtigher benedictie sal een stat verheuen worden: ende mitter quader monde sal sij ter neder gheworpen worden. .

12

die sijnen vrient versmaet die heeft behoefticheit van herten: mer die wijse man sal swighen.

13

Die boeslijc wandert hi openbaert die heymelijcheden: mer die ghe-

[p. *220]

trouwe heelt dat hem beuolen si.

14

daer gheen beleider en is sal dat volc vallen. mer daer is salicheit daer veel raden sijn.

15

Hi sal ghecastiet worden mit quade die ghelofte doen voer enen vreemden. Mer die hem wachtet vanden stricken. hi is seker.

16

Een gracioes wijf sal glorie vinden: ende die vrome sullen rijcheden hebben.

17

Die ontfermighe man doet wel sijnre zielen: mer die fel is. werpet sijnen naesten van hem.

18

Die onghenadighe doet onghestadighe wercken: mer die ghene die gherechticheit saeyt. hi sal hebben ghetrouwen loon.

19

Goedertierenheit bereidet dat leuen: ende dat nauolghen der quader bereidet die doot.

20

Dat quade herte is veronwaerdende den here: ende sine wille is inden ghenen die simpelijc wandelen.

21

Hant in die hant en sal die quade niet ontsculdich sijn: mer der gherechtigher saet sal behouden worden.

22

Een schoen wijf ende sot: is als een gulden rinc in eenre soghen nose.

23

Der gherechtiger begheerte is alle guet: mer onghenadigher ontbeiden is gramscepe.

24

Sommighe deelen haers selfs guet ende worden te riker: ende ander rouen dat haer selfs niet en is ende sijn altoes in ghebreke.

25

Die ziel die wel spreect sal vet worden: ende die droncken maect sal droncken ghemaect worden.

26

Die dat coren berget hi sal onder dat volc gheuloect worden: mer benedictie soe sal wesen op der gheenre hoeft diet vercopen.

27

Vroech staet die ghene wel op die guet soect: ende die ondersoeker vanden quaden hi sal of verplet worden

28

Die betrouwen heeft in sine rijcheden hi sal vallen: mer die gherechtighe sullen groeyen als een groeyende blat.

29

Die sijn huys verstoert hi sal wint besitten: ende die sot is hij sal den wijsen dienen.

30

Des gherechtichs vrucht is hout des leuens: ende die die zielen ontfaen hi is wijs.

31

Of die gherechtighe in die werelt ontfaet: hoe veel meer dan die onghenadighe ende die sondaren