Bible in duytsche (Delftse bijbel 1477)

§ Capittel. .ix.

1

DIe wijsheit heeft haer een huus ghetymmert: si heuet verhouwen seuen calumpnen.

2

Si heuet haer offerhande ghedoot: ghemenghet den wijn: ende heeft haer tafelen voer gheset

3

Si heeft haer ioncwijf gesent dat sij ter borchwaert ropen soude: ende te muren vander stede.

4

So wie cleyne is hij come tot mi. Ende den onwisen sprac hij an.

5

Coemt ende eet mijn broot: ende drinct mijn wijn die ic v gemenghet hebbe

6

Laet die kintsheit ende coomt ende wandert inden weghe der vroetscappen.

7

Die enen bespotter leert hij

[p. *218]

doet hem onrecht: ende die den ongenadighen berispt. hi beiaghet te sijnre behoef ene smette.

8

En wil niet berispen den bespotter: dat hi di niet en hate. Berispe den wisen: ende hi sal di minnen.

9

Ghif den wijsen oersaec: ende die wijsheit sal hem ghemeerret worden Leer den gherechtighen: ende hi sal hem haesten tontfaen.

10

Dat begin der wijsheit is die vrese des heren: ende der heyligher const is vroescap.

11

Want bi mi sullen dine daghen ghemenichfoudicht worden: ende die iaren dijns leuens worden toe gheleit.

12

Bistu wijs soe sal dit di seluen sijn: ende dijnen naesten: met bistn sot ende een bespotter: soe sulstu allene dat quaet draghen.

13

Een sot wijf ende calachtich: ende vol ondierheden ende niet mit allen wetende.

14

sat in die doer haers huys op een stoel. in een hoghe stat vander poort:

15

om te ropen die daer ghinghen al haren wech: ende die ghingen haers weges.

16

Die cleyn is. Come hier tot mi. Ende den verwoeden sprac hi an

17

Tferstolen water is talre suetste: ende dat verborghen broot is dat suetste.

18

Ende hi en wiste niet dat daer gyganten sijn. Ende dat die mit haer worscappen sijn inden gront der hellen. Want so wie tot haer waert gaen sal. hi sal nederwaert gaen ter hellen. Want die van haer gaet die sal behouden worden