Bible in duytsche (Delftse bijbel 1477)

§ Ca viij

1

EN roopt die wijsheit niet: ende en gheeft die vroetscap haer stemme niet?

2

Si staet inden oppersten ende ten hoechsten toppe. bouen den wech in den midden der paden.

3

Neuen die poorten vander steden. indien doren spreect sij ende seit.

4

O mannen tot v roop ic. ende mijn stemme is totter menschen kinderen.

5

Ghi cleine verstaet behendicheit ende ghi onwise merct int herte.

6

Hoert want ic sal spreken van grote dinghen: ende mijn lippen sullen worden ontdaen om gherechticheden te voersegghen.

7

Mijn kele sal die waerheit pensen. ende mijn lippen sullen die onwaerdige veronwaerden.

8

Alle mijn reden sijn gerechtich: in dien en is gheen quaet noch verkeertheit.

9

Sij sijn recht den ghenen diese verstaen: ende effen den ghenen die conste vinden.

10

Ontfanc mijn discipline ende niet ghelt: ende verkiest meer leringhe dan gout.

11

Want wijsheit is beter dan alle preciose rijcheden: ende al datmen begheert en machmen tegen haer niet rekenen.

12

Ic wijsheit wandere inden

[p. *217]

raden: ende ic byn onder gheleerde ghepense.

13

Des heren vrese hatet tqade: hoechdraghenheit ende houaerdye ende quaden wech ende den mont mit tween tongen lachtere ic.

14

Mijn is raet ende gerechticheit mijn is die vroetscap ende mijn is die cracht.

15

Bi mi regneren die coninghen ende die ghene die die wet maken onderscheidenheden. Bi mi is gherechticheden.

16

Bi mi ghebieden die princen: ende bi mi onderscheiden die machtighe die gherecticheit.

17

Ic minne die ghene die mi minnen: ende die vroech waken tot mi die sal mi vinden.

18

Rijcheden ende glorien sijn mit mi: hoge rijcheit ende gherechticheit.

19

Ende mijn vrucht is beter dan gout ende preciose stenen: ende mijn spruten sijn beter dan wtghecoren siluer.

20

Ic wandere inden weghe der gherechticheit: in midden den paden des vonnissen:

21

om rijc te maken die mi minnen: ende om haren scat te veruollen.

22

Die here besat mi inden beghinne sijnre wegen. eer hi yet maecte vanden beghinne:

23

vander ewicheit bin ic gheordineert ende vanden ouden: eer die aerde ghemaect was.

24

Ende noch waren die afgronden niet: ende ic was te hant ontfaen. Ende noch en waren niet wtghespronghen die fonteynen der wateren:

25

noch die berghen mit swaren hopen niet. Voer alle die houelen was ic ghebarende.

26

Ende noch en hadde die aerde niet ghemaect: noch die riuieren ende die herren der rontheden der werelt.

27

Doe hi die hemelen bereide soe was ic daer mede: dat hi mit sekeren wet ende ommeringhen der afgronden ommesettede.

28

Doe hi die sterren bouen vast settede: ende woech die fonteynen vanden wateren.

29

Doe hij omme die zee settede haren termijn: ende hi wet settede den wateren. dat si ouer haren termijn niet gaen en souden. Doe hi woech die fondamenten vander aerden:

30

soe was ic mit hem alle dinc makende. Ende ic hadde genoechte elcs daghes spelende voer hem tot alre tijt:

31

ende spelende in die rontheit der werlt: ende mijn ghenoechte sijn te wesen mit kinderen der menschen.

32

Nu hier om mijn kinderen hoert mi. Si sijn salich die hueden mine weghen.

33

Hoert discipline ende weest wijs: ende en wiltse niet afwerpen

34

Salich is die mensche die mij hoert: ende die daghelijcs waect voer mijn dore: ende wacht die stilen van mijnre doren.

35

Die mi vinden sal hi sal dat leuen vinden: ende sceppen salicheit vanden heer.

36

Mer die teghen mi sondighen sal: die sal sijn siel quetsen. Alle die mi haten die minnen die doot