Bible in duytsche (Delftse bijbel 1477)

§ Capit .v.

1

SOne mijn verstaet mijn wijsheit ende neige dijn oren tot mijnre vroetscap:

2

dattu behueden moghes die ghepense: ende dat dijne lippen discipline moghen behouden. En verstant niet der bedriechnisse vanden wiue.

3

Want eens lichts wiues lippen sijn een drupende roete: ende haer kele is blinckender dan olye.

4

Mer haer leste sijn bitter als alsen: ende haer tonge is scarp als een zwaert aen beiden ziden snidende.

5

Haer voeten gaen neder inder doot: ende haer ganghen trecken ter hellen waert

[p. *214]

6

Si en wanderen niet doer die pat des leuens: haer ganghen sijn vluchtich ende onbegripelic

7

Hier om mijn sone hoer mi nu: ende en ganc niet wech vanden woerde mijns monts.

8

Doch van haer verre dinen wech: ende en nake niet den doren van haren huse.

9

Ende en ghif den vreemden dijn eer niet: noch dine iaren den wreden.

10

Dat machschien niet en worde veruolt die van buten mit dinen crachten: ende dat dijn arbeit si dan in een vreemt huus:

11

ende datu dan ten lesten versuchtes alstu sulste hebben verteert dijn vleysch ende dijn lichaem: ende dan segghes.

12

Waer om heb ic veronwaert discipline: ende waer om en ontfinc mijn herte niet berispinge?

13

Noch en hoerde der gheenre stemme niet die mi leerden: ende en neighede mijn oren niet ten meesteren waert.

14

Want ic hebbe welna gheweest in allen quaden: inder middewaert der vergaderinghe ende der synagoghen.

15

Drinc dat water wt dijnre cysternen: ende die fonteinen dijns putten.

16

Dine fonteynen sullen daer buten lopen: ende inden straten so deelt dijn wateren.

17

Du sulstese allene hebben: ende die vreemde en sullen dijns niet deelachtich sijn.

18

Dijn adere sal sijn gebenedijt: ende verblide mitten wiue dijnre ioncheit

19

Si is een lieue hertinne: ende alte bequamen hindekijn Haer borsten sullen di in alre tijt veruollen: ende hebt eenpaerlike ghenoechte in haerre minnen.

20

Sone mijn waer om wortstu verleit van eenre vreemder: ende wordes gheuoedet in eenre ander scoot?

21

Die here aenscouwet des menschen weghen: ende hi merct alle sine voertganghen.

22

Den onghenadigen vanghen sijn quaethede: ende hi wort toegestrict mitten banden sijnre sonden.

23

Hi sal steruen want hi en had ghene discipline: ende hi sal worden bedrogen mitter menichten sijnre sotheit