Bible in duytsche (Delftse bijbel 1477)

§ Capittel iiij.

1

KInder hoert des vaders discipline: ende verstaet dat ghi wijsheit moghet weten.

2

Ic sal v gheuen guede ghiften: en laet mijn wet niet.

3

Want

[p. *213]

ic was oec mijns vaders soen: teder ende eengheboren voer mijn moeder:

4

ende si leerde mi ende seide. Dijn herte ontfae mijn woerden: wachte mijn geboden ende du sulste leuen.

5

Besitte die wijsheit: besitte die vroetscap. En vergheets niet: noch en keerdi niet af van die woerden mijns monts.

6

En laetse niet ende si sal di behoeden: mintse ende si sal di behouden

7

Dat beginsel der wijsheit is. besitte wijsheit: ende in alle dine besittinghe ghecrighe vroetscappen.

8

Begrijpse ende si sal di verheffen: ende alstuse ommehelses soe sulstu van haer worden verheuen.

9

Si sal dinen hoefde gheuen toewassen van gracien: ende mit eerliker cronen salse di beschermen

10

Sone mijn hore ende ontfae mine woerden: op dat di worden ghemenichfoudicht die iaren dijns leuens.

11

Ic sal di toghen den wech der wijsheit. ende ic sal di leden doer den wech der gerechticheit:

12

ende alstu daer in ghetreden sijtste so en sullen dine toepaden niet worden ghenauwet: ende lopende soe en sulstu niet hebben teghen te stoten.

13

Houde discipline: ende en laetse niet Behuetse want si is dijn leuen.

14

En heb ghene ghenoechte inder ongenadiger paden: noch di en ghenoghe niet der quader wech.

15

Vlie daer wt ende en lider niet dore: keer of ende laetse.

16

Want si en slapen niet si en hebben quaet gedaen: ende die slaep en wort hem niet ghenomen tensi dat sien verplet hebben.

17

Si eten dat broot der ongenadicheit: ende drincken den wijn der ongherechticheit.

18

Mer der gerechtigher pat gaet voert als blinckende licht: ende wasset totten volmaecten daghe.

19

Der onghenadigher wech die is doncker: si en weten niet waer si vallen sullen.

20

Sone mijn hoer na mine redenen: ende neyghe dijn oren neder tot minen spraken.

21

En laetse niet wech gaen van dinen oghen: wachtse inden middewaert dijnre herten.

22

Want si sijn leuen den ghenen diese vinden ende gesontheit van allen vleysche

23

Mit alre huede wachte dijn herte: want daer wt coemt dat leuen.

24

Doe van di den quaden mont: ende quaetsprekende lippen sullen verre van di wesen.

25

Dijn oghen aensien rechte dinghen: ende dijn wijnbraeuwen sullen voer dijn screden gaen.

26

Beleide den pat tot dinen voeten: ende alle dine wegen sullen vast worden.

27

En keer niet of ter luchterziden noch ter rechterziden. Keer of dinen voet vanden quaden. Want die here bekent die weghen die ter rechter ziden sijn: mer si sijn verkeert die ter luchter zide sijn. Want hi sal recht maken uwe lopen: ende uwe weghen sal hi in vreden wel geleiden