Bible in duytsche (Delftse bijbel 1477)

§ Capittel. .ij.

1

SOne mijn ist dattu mine woerden onfaetste. ende du mine geboden berghes bi di:

2

so dat dijn ore hore die wijsheit: so neighe dijn herte neder om die vroetscap te bekennen.

3

Want isset dattu die wijsheit aenroepeste. ende du dijn herte neder neyghes ter vroetscippen.

4

ist dattuse sokes als gelt ende duse ontgraues als scat ende tresoer:

5

dan sulstu des heren vrese verstaen: ende gods conste vinden:

6

want die here gheeft wijsheit: ende wt sinen monde so is conste ende vroetscap.

7

Hi sal behueden der gerechtigher salicheit: ende beschermen die ghene die simpelijc wanderen:

8

houdende die paden der gerechticheit: ende wachtende der heiligher weghen.

9

Dan sulstu verstaen die gerechticheit ende dat vonnisse ende die effenheit: ende elken gueden wech.

10

Ende ist dat die wijsheit in dijn herte coemt. ende const dijnre zielen ghenoecht:

11

so suldi dien raet behueden: ende die vroetscap suldi houden.

12

so dattu sulste worden beschermt vanden quaden wege: ende vanden mensche die verkeertliken spreect.

13

Die laten den gherechten wech: ende wanderen doer die doncker wegen.

14

Die verbliden als sij quaet ghedaen hebben ende veruroechden in alte quade dinghen.

15

Welker weghen verkeert sijn: ende van quader gherucht haer toepaden.

16

so dattu moghes beschermt sijn vanden vreemden wiuen: ende van eenre van buten die haer woerden sochtelijc spreect:

17

ende laet den beleider haer ioghet:

18

ende vergeet die beloften haers gods. Want haer huus is ghedaelt ter dootwaert: ende haer paden ter hellenwaert.

19

Alle die tot haer ingaen en sullen niet wederkeren: noch begripen die paden des leuens

20

Dattu wanderen moghes inden gueden wech. ende hueden der gherechtigher paden.

21

Want die gerechtich sijn: sullen wonen int tlant: ende die simpele sullender in geduren.

22

Mer die onghenadighe sullen worden verloren vanden lande: ende die ongerechtelijc doen: sullen daer wt worden verdreuen