Bible in duytsche (Delftse bijbel 1477)

§ Capittel. .I.

1

SAlomons parabel dauid des conincs soen van israhel:

2

om te weten wijsheit ende discipline. ende om te verstaen woerden der vroetscappen:

3

ende om te ontfaen die wijsen der leringhe gerechticheit ende vonnissen ende effenheit:

4

dat den cleynen worde ghegeuen behendicheit Ende den ionghelinc conste ende verstandenisse.

5

Die wise diet hoort sal te wiser sijn: ende die verstandel sal die bestierheden besitten.

6

Hi sal in sinen sinnen merken die parabolen ende die bedudenisse: der wijser woerden ende haer gheraetselen.

7

Des heren vrese is begin der wijheit. Die sotten veronwaerden die wijsheit ende die leringhe.

8

Mijn zoon hoer dijns vaders disciplijn ende en laet niet dijnre moeder wet.

9

dat an dijn hooft gracie worde ghedaen: ende enen halsbant omtrent dinen hals.

10

Sone mijn ist datti dier sondaers smeken: en gheloeft hem niet.

11

Ist dat si segghen coemt mit ons. spien wi na bluet. laet ons heimelic berghen stricken te vergheefs teghen den onscalcken.

12

ende verslinden wien als die helle leuende ende geheel als een die nedergaet in enen put.

13

Wij sullen vinden alle preciose guet. Wij sullen onse huse vollen van roue

14

werpt loth mit ons. ende ene buerse si onser alre.

15

Sone mijn en ganc mit hem niet Verbiede dinen voet van haren paden

16

Want haer voeten lopen ten quade: ende si haesten hem om bluet wt te storten.

17

Want te vergheefs werptmen dat net voerden gheuloghelder voghelen oghen.

18

Si spien oec na haer selfs bluet: ende pinen hem boeslijc te doen tegen haer zielen.

19

Elcs ghyerichs weghen begripen aldus der gheenre zielen die guet besitten.

20

Die wijsheit predict daer buyten. inder straten gheeft sij haer stemme.

21

Ende roopt int hooft vanden scaren. Si sprect haer woerden in den doren vander poorten ende seit.

22

Gi cleine hoe langhe mindi kintsheit. ende hoe langhe sullen die sotte begeren dat hem hinderlijc is. ende donwise die conste haten?

23

Wort bekeert tot minen berispen. Siet ic sal v voertbrenghen minen gheest: ende tonen v mine woerden.

24

Want ic riep: ende gi veronwaerdet. Ic stac mijn hant voert ende niemant en was diet ansach.

25

Ghij versmade al minen raet. ende verrokeloest mine berispinghe.

26

Hier om sal ic oec lachen in uwer verderfnisse. ende ic salt veronwaerden als v ancomen sal dat ghi ontsaghet.

27

Als v allen haestelijc v verdriet ende v verderfnisse sal ancomen als een tempeest. als op v comen

[p. *211]

sal tribulacie ende vernoy.

28

dan sullen sij mij anroepen: ende ic en sals niet horen. Si sullen vroech opstaen: ende en sullea mi niet vinden:

29

om dat si in haten hadden discipline: ende niet en ontfinghen des heren vrese:

30

noch hem niet en hilden an minen raet: ende om dat sij lachterden alle mijn berispen.

31

Hier om sullen sij eten die vruchten haers weghes. ende sullen worden ghesaet van haren raden.

32

Dat ofkeere vanden cleynen sal hem doden. ende die voerspoet der sotten suldi verliesen.

33

Mer so wie mi horen sal. hi sal sonder anxt rusten. ende ghebruken oueruloedicheden: ende die vrese vanden quaden sal hem ofgenomen worden