Bible in duytsche (Delftse bijbel 1477)

§ Capit .xli

1

IC en sallen niet verwecken als of ic wreet waer. Want wie sal mijn aensichte mogen wederstaen:

2

wie heeft mi te voren ghegeuen dat ic hem ghelden mach? Al dat onder den hemel is dats mijn.

3

Ic en sallen niet sparen mit machtighen woerden: die verciert sullen sijn om te biddene.

4

Wie sal ondecken dat aensicht sijns cleets? Ende wie sal gaen in midden van sinen mont?

5

Wie sal ontdoen die poorten van sinen aensichten? Al om ende tomme sijn tanden is vrese:

6

sijn lichaem is als gegoten schilde: ende te gader gheuoecht mit scillen dien dwinghen.

7

Die ene scille op dander gheuoghet: ende daer dore en comet ne ghene adem.

8

Die ene sal an dander hanghen ende si sullen dene den anderen houwen: ende houdende hem en gheen sins en sullen si worden ghesceiden.

9

Sijn nyesen is claerheit van viere: ende sijn oghen sijn als wijn braeuwen vander dagheraet

10

wt sinen monde comen lampen: ghelijc bernende toortsen van vyere.

11

Wt sinen naselocken gaet roec. als wt enen gloeyenden wallenden pot.

12

Sijn adem doet colen bernen: ende een vlamme gaet wt sinen monde.

13

in sinen hals sal sijn stercheit ghedueren: ende gebreke sal voer sijn aensichte gaen.

14

Die leden van sinen vleysche hanghen te gadere. Hi sal iegen hem senden blixemen: ende si en sullen te gheenre ander stat ghedraghen wor-

[p. *209]

den.

15

Sijn herte sal worden verhert als een steen: ende sal werden ghehardt als een smits aenbelt.

16

Als hi sal sijn toebracht so sullen die enghelen ontsien: ende van anxte sullen si worden gesuuert.

17

Als hem tswaert begripen sal so en sal niet moghen gheduren noch spere noch halsberch.

18

Want hi sal yser achten ouer stro: ende metale als vule hout

19

Een man een scutter en sallen niet veriaghen: die stene vander slingeren sijn hem verwandelt in stoppelen.

20

Hi sal den smedehamer achten als stoppele: Ende hij sal bespotten den ghenen diet spere blenct.

21

Onder hem sullen wesen die radyen vander sonnen: hij sal tgout onder hem spreiden als modder.

22

Hi sal die diepheit der zee doen wallen als een pot: ende salse maken ghelijc den saluen sieden.

23

Achter hem sal die wech lichten: hi sal den afgront achten als enen ouden.

24

Ende gene machte en is op die werelt diemen ieghen hem rekenen mach: want hi is gemaect dat hi nyemant ontsien en sal.

25

Hi siet alle hoghe dinc: want hi is coninc bouen al die kinderen der houaerdicheit