Bible in duytsche (Delftse bijbel 1477)

§ Ca .xlij

1

ENde iob antwoerde den here ende seide

2

Ic wete dattu alle dinc vermoechste: ende datti ne ghene ghepens verborghen en is

3

Wie is dese die sinen raet heelt sonder conste? hier om heb ic sottelijc ghesproken: ende dat bouen maten ghinc bouen mine conste.

4

Hore ende ic sal spreken: ic sal di vragen antwoerde mi.

5

Mitten horen mijnre oren heb ic di ghehoert: mer nv siedt mijn oghe dij.

6

Hier om berispe ic mi: ende ic doe penitencie in spranckelen ende asschen

7

Na dien dattie here dese woerden ghesproken hadde tot iob: soe seide hi tot elyphas van theman. Mijn toren is vergramt teghen di ende teghen dinen twe vrienden: want ghi en hebt also gerechtelijc voer mi niet ghesproken als iob minen knechte.

8

Daer om neemt mit v seuen stieren ende seuen rammen: ende gaet tot iob minen knecht: ende offert holocauste ouer uwe luden. Want iob mijn knecht sal voer v bidden. Ende ic sal sijn aensichte ontfaen: so dat v dese sotheit niet ghegouden en worde. Want ghi en hebt te mi waert niet rechte ghesproken: als iob mijn knechte

9

Dus ghinghen wech elyphas van theman. ende baldad van suich. ende sophar van naamath: ende si deden also hem die here gheseit had: ende die here ontfinc iobs aensichte.

10

Ende die here benedide iobs penitencie: doe hi ouer sine vriende bat. Ende die here gaf iob weder dubbel al dat hi ghehadt had.

11

Ende te hem quamen alle sine bruederen ende alle sijn susteren. ende alle dien te voren kenden: ende si aten mit hem broot in sijn huus. Ende si roerden thooft op hem: ende si troestenen van alden quade dattie here op hem ghebrocht had: ende elc gaf hem een scaep ende een gulden inaure.

12

Ende die here gebenedide iobs achterste meer dan sijn beghinnen. Ende hem worden viertien dusent scapen. ende ses dusent kemels: ende dusent iocke ossen. ende dusent ezelinnen:

13

ende hi hadde seuen sonen ende drie dochteren.

14

Ende hi heet der eenre name dach: ende der andere name cas-

[p. *210]

siam: ende der derder name horen van blancketten

15

In alden lande en vantmen so schone wiuen niet als iobs dochteren waren. Ende haer vader gaf hem erueachticheit onder haer broeders.

16

Hierna leefde iob hondert ende veertich iaer: ende hij sach sijn kindere. ende sijnre kinder kindere tot inden vierden gheslachte: ende hi starf out ende vol van daghen

§ Hier gaet wt iobs boock.