Bible in duytsche (Delftse bijbel 1477)

§ Ca .xl

1

ENde die here antwoerde iob wt den bedrusche ende seide.

2

Gorde toe dijn lenden als een man: ic sal di vraghen: ende antwoerde mi.

3

Sulstu mijn vonnisse te niet maken. ende sulstu mi verdomen om di seluen gherechte te maken?

4

Ende oftu enen arme hebste ghelijc gode: ende oftu mit alsaulker stemmen luutste als god duet:

5

so omhanghe die mit schoenheden ende worde opgheheuen int hoghe: ende wes gloriose ende doch scone cleder an.

6

Verdriue den houaerdighen in dinen toren ende veroetmoedichtse ende elken houaerdighen veroetmoedighe daer du ne sietste.

7

Besich alle die houaerdige ende bescaemtse: ende doch die quade tonder in hore stat.

8

Verberchse te gader inden ghemul: ende verdrencke haer aensichten in die graft:

9

ende ic sal belien dat ic dijn rechterhant sal moghen behouden.

10

. Sich behemoth dien ic mitti ghemaect hebbe: sal hoy eten als een osse.

11

. Sijn stercheit is in sijn lendenen:

[p. *208]

ende sijn machte is in die nauele van sinen buke.

12

Hi dwinghet sinen staert als een cederhout: die zenuwen van sinen manliker kunden sijn vermoeyt.

13

Sijn beenre sijn als pipen van copere: dat onderscot van sinen naselocken is als yseren platen.

14

Hij is tbeginsel van gods weghen. Dien maecte sal sijn zwaert voertbrenghen:

15

die berghen draghen dese cruden. Alle die beesten vanden ackere spelen daer:

16

hi slaept onder die scaduwe int heimelike vanden riede: ende in wacken steden.

17

Die scaduwen bedecken sine scaduwe: die wilghen vander lopender riuieren sullen om hem staen

18

Siet hi sal ene riuiere verslinden ende hi en sals niet verwonderen: ende hij heeft betrouwen dat die iordane in sinen mont vloeyen sal.

19

In sinen oghen sal hine vaen als mit enen hengel: ende mit elsenen sal hi sine naselocke doreboren

20

Sulstu leuyathan wt moghen trecken mit een henghel: ende sulstu sijn tonghe binden mit eenre coorden?

21

Sulstu enen rinc doen in sinen naselocken: ende sulstu mit eenre armillen sine wanghe doerboren?

22

Sal hi die bedinghe te di waert menichfoudighen: ofte sal hi safte dinghen tot di seggen?

23

Sal hi mitti belofte maken: ende sultune ontfaen tot enen eweliken knechte?

24

Sultune bespotten als een voghel: of sultune binden mit dinen ioncwiuen?

25

Die vrienden sullen houwen te stucken: die coopluden sullen deylen.

26

Sultu die netten veruollen mit sinen velle: ende enen vischcorf mit sinen hoofde?

27

Leg dijn hant op hem? Gedencke vanden stride: ende en ghedogher niet meer toe te spreken.

28

Sich sijn hope sal di bedriegen: ende hi sal nedergheworpen worden daert alle creaturen sien sullen.