Bible in duytsche (Delftse bijbel 1477)

§ Capittel .xxxviij

1

Ende die here antwoerde iob wt enen bedrusche ende seide?

2

Wie is dese die sentencien windet in ongeleerden redenen.

3

Gorde dijne lendene toe als een man: ic sal di vraghen ende antwoerde my.

4

Waer waerstu doe ic leide die fondamenten vander werelt? Segt mi oftu verstandenisse heuveste.

5

Weetstu wie haer maten leide: of wie die linie bouen die aerde trac?

6

Waer op sijn der aerden stapelen vast ghemaect? of wie liet haren hoernic stene

7

als mi die morgen sterren te gader loefden: ende mi speelden alle gods kindere?

8

Wie besloot die zee mit doren doe sij wt brac als of si wt eenre vrouwe wijflicheit ghecomen had:

9

doe ic die wolke haer tot enen clede gaf. ende icse omwant mitter donckerheit als mit kijnschen doken?

10

ende ic omsettese mit minen terminen. Ende leider grendelen ende doren vore:

11

ende seide haer. Tot hier sulstu comen ende niet vorder en sulstu gaen: ende hier sulstu breken dine heffende vluede.

12

Hebstu na dijnre geboerten die dagheraet gheboden. ende hebstu der morgenstont ghewijst haer stat:

13

hebstu stotende die einden vander werelt ghehouden. ende heefstuer die quade wt verdreuen?

14

Men sal dat teiken weder setten als modder: ende het sal staen als een cleet

15

Vanden quade salmen haer lichte nemen: ende den hoghen arme salmen breken

16

Hebstu ghegaen in die diepheit vander zee: ende hebstu ghewandelt int einde vanden afgronden?

17

Hebben di die poorten der doot ontdaen gheweest: ende hebstu die donckerachtighe doren gesien?

18

Hebstu ghemerct die wijtheit vander werelt? Segt mi oftuut al weetste

19

in wat weghe dat woent tlicht: ende welc is donckerheden stat:

20

dattu elken te sinen lande leiden mogheste. ende dattu verstaen mogeste die weghen sijns huus

21

Wistu doe dattu gheboren worden souste. ende wistu tghetal van dinen daghen?

22

Hebstu geweest in des snees tresoren: ende hebstu ghesien die tresore des haghels:

23

die ic bereet hebbe in des viants tide. inden daghe des gheuechtes ende des strijts?

24

Dore wat weghe spreit haer tlicht. ende scheit daer

[p. *206]

die hetten bouen der aerden?

25

Wie heeft den stercken reghen loop ghegheuen. ende den wech den ludenden donre.

26

dat hij reghenen soude op tlant daer en gene mensche en is inder wildernisse daer en gene sterflijc mensche en leuet:

27

om dat twoeste lant daer en gene wech en leyt veruollen soude. ende dat hi tgroeyende cruut soude doen wassen?

28

Wie es des reghens vader: of wie heeft ghemaect die dropelen vanden douwe?

29

. Wt wies buuc is dat ijs gecomen: ende wie heeft die vorste vanden hemel gewonnen?

30

Die wateren worden verhart in die ghelikenisse van stenen: ende tbouenste vanden afgronde verstijft te gadere.

31

Sulstu moghen te gader brenghen die blickende sterren vanden seuen sterren: of sulstu moghen ghesceiden den omloop van arcturo?

32

Brenstu die dachsterre wt te haren tide: ende doestu op risen die auontsterre optie kinderen vander werelt?

33

Weetstu die ordinancie des hemels: ende sulstu daer of die redenen legghen inder aerden?

34

Sulstu dijn stemme opheffen inden neuele: ende sal tgheruchte vanden wateren di ouerdecken?

35

Sulstu die blixemen senden ende sullense dan gaen: ende sullen si te di wederkeren ende segghen wij sijn hier?

36

Wie heeft binnen den mensche gheleit die wijsheit: of wie heuet den hane verstandelheit ghegheuen?

37

Wie sal vertellen die redenen vanden hemelen: ende wie doet slapen den geluut des hemels?

38

Wanneer wort tghemul ghestort in die aerde ende wanneer maectemen die rusen?

39

Sulstu der leeuwinnen haer proeye vaen. ende haren wulpen ziele veruollen:

40

wanneer si in die holen legghen ende in die speluncken sculen om verraden ?

41

Wie bereit den rauen sijn spise: als sine ionghen te godewaert ropen dolende om dat si ne ghene spise en hebben?