Bible in duytsche (Delftse bijbel 1477)

§ Ca .xxxvij.

1

HIer op veruaert haer mijn herte: ende is verporret van sijnre stat.

2

Hi sal horen sijn verhoringe inden anxte sijns stemmes: ende den gheluut die wt sinen monde coemt.

3

Onder alle die hemelen merct hi: ende sine lichte is bouen al die termine vander werlt

4

Achter hem sal een gheluut bruusschen: ende sal donren mitten stemme sijnre grootheit: ende men salt niet vergronden alsmen sine stemme gehoert heeft

5

God sal donren mit sijnen stemme wonderliken: die grote ende onbegripelike dingen duet.

6

Die den snee beueelt dat hi nedercome in die aerde: ende den reghen des winters ende die stofregen sijnre stercheit.

7

Die in alre menschen handen beteikent om dat hi elcke sijn werken bekennen sal

8

Een beeste gaet in hare sculinge: ende si sal wonen in haren hole.

9

Vanden binnensten sal die tempeest wt comen: ende van arcturo sal die coude comen.

10

Als god waeyet so wasset ijs: ende echter storten hem die watere alte wide.

11

Die tarwe begeert die wolken: ende die wolken stroeyen haer lichte.

12

Die alle dinghen doet ommegaen al om ende tomme werwaerts datse die wille hare beleider leidet. te al dien dat hi hem ghebieden sal opt aensicht vander ronder werelt:

13

ofte in ene geslachte ofte in haer lant: of in wat stede sijnre ontfermherticheit dat hijse beueelt te vinden.

14

Iob hore hier na: stant ende merke gods wonder.

15

Weetstu welc tijt dat god den reghenen beual: dat si to-

[p. *205]

ghen souden tlicht van sinen wolken?

16

Weetstu die grote pade vanden wolken: ende die volmaecste conste?

17

En sijn dijn cleder niet heet als tlant dore waeyet mitten suden winde?

18

Machschien maecstu mit hem die hemelen: die alte vaste sijn als of si van metale ghegoten waren.

19

. Toghe ons wat wi hem segghen moghen. Want wi worden bewonden in donekerheden.

20

Wie sal hem vertellen dat ic spreke? Ist oec dat een mensche spreect men sallen verslinden:

21

ende nv en sien si tlichte niet haestelijc sal worden verwandelt die lucht in wolken: ende ene ouerlidende wint salse verdriuen.

22

Tgout comt van noerden: ende van gode vreesachtich prijs.

23

Wine moghen hem niet waerdelijc vinden. Hi is groot in stercheden ende in vonnisse ende in gherechticheit: ende men machen niet vertellen.

24

Daer om sullene die mannen ontsien: ende sij en sullen niet dorren scouwen alle die hem sullen wijs doncken