Bible in duytsche (Delftse bijbel 1477)

§ Ca .xxxij. :

1

DEse drie mannen lieten achter iob te antwoerden: om dat hi hem seluen gherechte dochte

[p. *200]

2

Ende helyu barachiels soen van busy. van rams geslachte wort gram ende toornich. Want hi was gram ieghen iob: om dat hi seide dat hi gherechte was vore gode.

3

Hi was oec vertorent ieghen sine vrienden. om dat si ghene tamelike antwoerde geuonden en hadden: mer dat si allene iob verdoemt hadden

4

Dus ontbeide helyu iob doe hi sprac: om dat sij oudere waren dier spraken

5

Ende doe hi sach dat hem die drie niet gheantwoerden en mochten. soe wort hi anxtelike toornich.

6

Ende helyu barachiels soen van busi antwoerde iob ende seide. Ic bin ionghere van tide: ende gi sijt ouder. Hier om liet ic mijn hoeft nederhanghen. ende ontsach mi mine sentencie te segghen.

7

Want ic hoepte dat. dat die lancste outheit spreken soude: ende dat die menichte van iaren wijsheit leren soude.

8

Mer also ic sie so is die gheest inden mensche ende des almachtichts inspiracie gheest verstandenisse.

9

Want die lancste leuen en sijn niet wijs: noch douders en verstaen tfonnisse niet.

10

Daer om sal ic segghen hoert mi: ic sal v oeck mijn wijsheit toghen.

11

Want ic heb v redene ontbeit: ic heb v wijsheit ghehoert. Tot dat gi scheldende wort in uwen redenen: ende ic mercte tot dat ic waende dat ghy yet segghen sout.

12

Mer alsoe ic sie soe en is niemant van v die iob berispen mach: of die van v sine redene gheantwoerden mach

13

Dat ghi machschien niet segghen en sult wij hebben die wijsheit vonden: ende god heeften gheworpen ende niet enen mensche.

14

Hi en heeft mi niet ghesproken: ende ic en sal hem niet antwoerden na uwen redenen.

15

Si ontsaghen hem: ende en antwoerden niet mere: si daden die spraken wech van hem

16

Om dat ic dus ghebeit heb ende si niet en spraken. om dat si stonden ende niet mere en antwoerden:

17

so sal ic oec mijn deel antwoerden: ende ic sal mijn conste togen.

18

Want ic bin vol redenen: ende die gheest mijns buucs perst mi.

19

siet mijn bnuc is nv als most sonder adem gat: die nyewe laghele scoert.

20

Ic sal spreken ende een luttel aensien: ic sal mine lippen ontdoen ende antwoerden.

21

Ic en sal en gheens mans persone wtnemen: ende ic sal gode ieghen ghenen mensche rekenen

22

Want ic en wete niet hoe langhe ic leuen sal. ende oft mijn maker mi cortelijc halen sal.