Bible in duytsche (Delftse bijbel 1477)

§ Capittel .xxviij.

1

TSiluer heeft die beghinsele van sijnen aderen: ende tgout heeft plaetse

[p. *196]

daer ment in smelt.

2

Men neemt yser vter aerden: ende dien stene die vanden hetten smelt verwandelt in metael.

3

Hi heeft in donckerheden tijt gheset ende hi merket alre dinghen einde. Den stene oec der donckerheit ende die scaduwe der doot

4

die sceidet die vluet vanden vreemden volke: die des arms mensche voet vergheten heeft ende die verdoelde.

5

Tlant daert broot op wies: is verwoest mitten viere in sijnre stat.

6

Des saphiers stat sijn haer stene: ende haer rusen sijn gout.

7

Die voghel en wiste den wech niet: ende des ghiers oghe en aensachse niet.

8

Der coepmans kindere en tredense niet: noch den leeuinne en ghinc daer niet dore.

9

Ten stene waert steect hi sijn hant voert: hi werpt die berghe omme van onder die wortelen.

10

In stenen heeft hi riuieren ghehouden ende sijn oghe heeft alle preciose dinc ghesien

11

Hi heeft oec ondersocht die diepheit vanden riuieren: ende dat verborghen was bracht hi in tlicht.

12

Mer waer vintmen die wijsheit: ende welc is die stat van verstandenissen?

13

Die mensche en weet haer waerde niet: ende men vintse niet in tlant daermen suetelijc in leeft.

14

Die afgront seit si en is in mi niet: ende die zee spreet sine is mit mi niet.

15

Men sal om haer niet gheuen ghefineert gout: noch men sal gheen siluer weghen om die wijsheit daer mede te copen.

16

Men salse niet rekenen ieghen die gheuerwede verwen van indien: noch ieghen die precioste sardonis stene noch den saphirus stene.

17

Gout noch glas en sal haers ghelijc niet sijn: noch men salse niet verwisselen om die gulden vaten die hoghe ende opgaende dinghen:

18

en salmen niet vermanen ieghen haer te rekenen. Want men trect die wijsheit vten verholen.

19

Want thopasien wt ethiophien en sal haer ghelijc niet wesen: ende men salse niet verchieren mit suuerre verwen.

20

Wanen coemt dan die wijsheit: ende welc is der verstandenissen stat

21

Sij is verborghen van alder leuender menschen oghen: ende sij is oec verborghen van voghelen des hemels

22

Tverlies ende die doot seiden: wi hebben haer nyemare ghehoert mit onsen oren

23

God verstaet haren wech: ende hi weet haer stat.

24

Want hi siet deinde vander werlt: ende hi bescouwet al dat onder den hemel is.

25

Die den winden ghewichte ghemaect heuet: ende hi weghet die wateren in maten.

26

Doe hi den reghen wet sette ende die wech den stormende vlaghen:

27

doe sach hijse ende verteldese: ende bereidse ende hi ondersochtse.

28

ende hi seide den mensche. Siet sheren vrese dats die wijsheit: ende te wachten van quaden dats die verstandenisse.