Bible in duytsche (Delftse bijbel 1477)

§ Ca .xxvij.

1

ENde iob seider noch toe ende voernam sijn parabolen ende seide.

2

Leeft god die mijn vonnisse wech ghedaen heeft ende die almachtighe die mine ziele ter bitterheit gebracht heeft.

3

Want also langhe als die adem in mi is ende gods gheest in mine nosegaten

4

soe en sullen mine lippen en ghene ongherechticheit spreken: noch mine tonghe en sal gheen loghen visieren.

5

Dat en moete mi niet gheschien: dat ic segghen sal dat ghij gherechte sijt. Want also langhe als ic gheduren mach: en sal ic mijnre onnoselheit niet afgaen.

6

Mine gherechticheit die ic hebbe beghonnen te houden: en sal ic niet laten. Want mijn herte en begeijpt mi niet: in al mijne leuene.

7

Mijn viant si ghelijc den quaden: ende mijn werdersake ghelijc den ongherechtighen.

8

Want wat hopen heeft een ypocrijt of hi ghierliken roeft: ende god sijn ziele niet en verlost.

9

Sal god sinen roop horen als vernoy op hem comt

10

Of sal hi moghen ghenoechte hebben inden almachtighen god: ende gode aen roepen in alre tijt?

11

Bider hant gods sal ic v leren welke die almachtighe heeft ende ic en sals niet verberghen.

12

Siet ghi hebtet gheweten alle: ende wat spreecti ydelheit sonder sake.

13

Dits eens quaets menschen deel voer gode: ende der ouerdadigher erfachicheit die si vanden almachtighen god ontfaen sullen.

14

Worden sijn kindere ghemenichfoudicht so sullen sij mede in swaerde sijn: ende sijn neuen en sullen niet worden ghesaet van brode

15

Die ander dien van hem waren sullen worden begrauen in verderffenisse: ende haer weduwen en sullen niet wenen.

16

Al vergadert hi siluer als aerde ende hi bereet cledere als moddere:

17

hi salse bereiden mer die gherechtighe salre mede ghecleet worden ende die onnosel sal sijn siluer deilen.

18

Hi heeft sijn huys ghesticht ghelijc der motten: ende ghelijc enen wachtere heuet hi een hutte ghemaect.

19

Als die rike slaept hi en draghet niet mit hem wech: hi sal sijn oghen ondoen ende hij en sal niet vinden.

20

Die armoede sallen begripen ghelijc watere: ende des nachts sal hem tempeest verdrucken.

21

Barnende wint sallen begripen ende wech voeren: ende als een bedruysche sal hine wech draghen van sijnre stat.

22

Ende hi sal die gheesel op hem senden. ende en sparens niet: van sijnre hant sal hi vliende vlien

23

Hi sal sijn hant op hem duwen: ende hi sal op hem blasen ende merken sijn stat