Bible in duytsche (Delftse bijbel 1477)

§ Ca .xxiij

1

ENde iob antwoerde ende seide.

2

Nu is oec mine reden in bitterheden: ende die hant mijnre plaghen is verswaert op mijnen versuchten.

3

Wie mach mi gheuen dat icken bekennen ende vinden mach: ende dat ic comen moghe tot sijnen trone?

4

Ic sal vonnisse voer hem setten. ende ic sal minen mont vollen mit berispinghen:

5

dat ic weten mach die woerden die hi mi antwoerden sal: ende ic verstaen mach wien mij spreken sal.

6

Ic en wil niet dat hij mit vele starcheden ieghen mij stride: noch dat hij mij verplette mit laste sijnre grootheit.

7

Hi brenghe voert gherechticheit ieghen mi: ende mijn vonnissen sullen comen totten seghe.

8

Gae ic oestwaert ic en sies niet: gae ic westwaert ic en sals niet verstaen.

9

Gae ic ter lnchterzide waert wat sal ic doen? Ic en sallen niet begripen. Kere ic mi ter rechterziden: so en sal icken niet sien.

10

Mer hi weet minen wech: ende hi sal mi prouen als gout dat doer tfier lijd

11

Sine voetstappen volchden mijnen voet: Ic heb sijnen wech ghewacht: ende ic en bin daer niet wtghegaen.

12

Ic en bin niet afghegaen vanden gheboden sijnre lippen: ende in mijnen bosem so berch ic die woerden sijns monts.

13

Want hi ist allene ende niemant en mach sine ghepeise afkeren: ende soe wat dat sijne ziele woude dat heeft hi ghedaen.

14

Als hij sijnen wille in mij veruolt heeft: so sijn hem ghereet vele ander dinghen dies ghelijc.

15

Ende hier om bin ic ghestoert van sinen aensichte: ende als icken merke soe bin ic mit anxte beureest.

16

God heeft mijn herte vermorwet: die almachtighe heuet mi ghestoert.

17

Want ic en bin niet verdoruen om die aencomende donckerheit: noch donckerhede en heuet mijn aensichte niet ouerdect