Bible in duytsche (Delftse bijbel 1477)

§ Ca .xxij.

1

ELiphas van theman antwoerde ende seide.

2

Machmen enen mensche ieghen gode rekenen: al is hi oec van volmaecte conste?

3

Wat batet gode al bistu gherechte: ofte wat gheefstu hem of dijn leuen onbesmet is?

4

Sal hi hem ontsiende di berispen ende mitti comen in vonnissen:

5

ende niet om dijne grote quaetheit ende dine ouertallighe ongherechticheden?

6

Want du heefste wech ghedraghen dijnre broeder pant sonder sake: ende die naecte heefstu beroeft van clederen.

7

Du en gaefste den moeden gheen water: ende den hongherighen ontoechstu dat broot.

8

Inder starcheit dijns arms soe besaetstuut lant: ende als een alte machtighen man soe hielstuut.

9

Du lietste die weduwe ydel wech gaen: ende der wesen armen braecstu.

10

Hier om bistu omvaen mit stricken: ende haestighe vrese verstoert di.

11

Ende du waenste dattu die donckerheden niet en soutste sien: ende mitten druusting van oueruloeyende watere niet verdruct te gaen

12

Ofte peystu weder god hogher is dan die hemel: ende dat hi verheuen wort bouen die hoocheden vanden sterren?

13

Ende du segste want wat weet god? Ende hi vonnest als doer donckerheit.

14

Die wolke is sine sculaedse: noch hi en merckt niet dat ons is: ende hi doerwandelt omtrent die heeren vanden hemel.

15

Waenstu wachten den pat vanden werelden dien die quade mannen ghetreden hebben

16

die wech geuoert sijn vore hare tijt: ende die riuiere heeft haer fondament auerecht gheworpen.

17

Die gode seiden ganc van ons wech: ende si achten den almachtighen god als ofte hijt niet doen en mochte:

18

als hi haer huse veruolt hadde mit guede. haer vonnisse moet verre van mij sijn.

19

Die gherechtighe sullent sien ende worden verblijt: ende die onnosel salse veronwaerden.

20

En is haer opheffen niet afghehouwen: ende sal dat vuer haer ouerbliuen niet verteren?

21

Daer om so wes hem onderdaen ende du sulste vrede hebben: ende daer bij sulstu dalre beste vruchte hebben.

22

Ontfanc die wet van sijnen monde: ende leg sijn woerden in dijn herte.

23

Op dattu bekeert wortste ten almachtighen god so sulstu ghesticht worden: ende hij sal die ongherechtighe doen verre van dijnre woninghe.

24

Hi sal di gheuen ouer aerde stene: ende ouer stene gulden riuieren.

25

Ende die almathtighe sal wesen ieghen dijnen vianden: ende tsiluer suldi worden ghehoopt.

26

Dan sulstu opten almachtighen god in weelden oueruloeyen: ende du sulste dijn aensicht te gode waert heffen.

27

Du sulste hem bidden ende hi sal di ghehoren: ende du sulste dijne beloften ghelden.

28

Du sulste een dinc visieren ende het sal di comen: ende licht sal schinen in dijnen weghen.

29

Want die hem veroetmoedighen sal. hi sal in glorien wesen: ende die sijn oghen neder houden sal. hi sal worden behouden

30

Ende die onnosel sal worden behouden

[p. *193]

mitter suuerheit sijnre handen.