Bible in duytsche (Delftse bijbel 1477)

§ Capittel .xx.

1

SOphar van naamath antwoerde ende seide.

2

Hier om volghen mijn ghepensen menichsins dene na dander: ende mijn ghedachte valt op menigherhande dinc.

3

Ic sal horen die leringhe daer du mi mede berispes: ende die gheest mijnre verstandenisse suldi antwoerden.

4

Ic weet dit vanden beghinne dattie mensche bouen der aerden gheset is:

5

datter quader prijs cort is: ende eens ypocrijts blijscap is ghelijc enen punte.

6

Ende climt sijne houaerde op totten hemele. ende al ghenaect sijn hoeft den wolken:

7

hi sal int einde verloren worden als vule missche. Ende dien saghen sullen segghen. Waer is hi?

8

Ghelijc enen droem die wech vlieget so en salmens niet vinden: ende hi sal ouerliden als nacht visioen.

9

Die oghe dien sach en sallen niet sien: ende sijn stat en sallen voert meer niet sien

10

sijn kinderen sullen worden vertreden mit armoede: ende sine handen sullen hem sine pijne ghelden.

11

Sijn beenre sullen worden veruolt mitten quaetheden sijnre ioncheit: ende si sullen mit hem slapen inden ghemulle.

12

Want alst quaet zuet gheweest heeft in sinen mont: soe sal hijt verberghen onder sijn tonghe.

13

Hi salt sparen ende hi en salt quaet niet laten: ende hi salt berghen in sijn kele.

14

Sijn broot sal in sinen buuc verkeren binnen in slanghen galle.

15

Die rijcheden die hi verswolghen heeft sal hi wt spuwen: ende god salse trecken wt sinen buke.

16

Hi sal der slanghen hoeft sughen: ende der slanghen tonghe sallen doden.

17

Hi en sal niet sien die beken vanden riuieren die scieten van honich ende van boteren.

18

Hi sal alle ghelden dat hi ghedaen heeft: nochtan en sal hi niet ten eynde comen Ende na die menichte van sinen visieren so sal hi ghedoghen:

19

want ontween brekende soe heeft hi bloot ghemaect des arms menschen huys. Hi roefdet ende en stichtet niet weder:

20

ende sijn buuc en wort niet versaet. Ende als hi hebben sal dat hij begheerde: en sal hijt niet moghen besitten.

21

Van sijnre spisen en bleef niet: ende daer om en sal niet blijuen van sijnen goede.

22

Als hi ghesaet sal sijn so sal hi worden vercrompen: hi sal barnen: ende alle pijn sal op hem comen

23

Ende oft sijn buuc veruolt worde so dat hi vten soude. in hem die gramscap sijns torens: ende dat hi op hem reghende sinen strijt

24

Hi sal vlyen iseren wapenen. ende hi sal lopen in enen metalen boghe:

25

als hi vte gheleit wort ende vte treckende is wt sijnre scheiden: ende hi blinct in sijnre bitterheit. Soe sullen gaen ende comen op hem eyschelike:

26

alle donckerheden sijn verborghen in sijnen heymelijcheden. Vier sal hem verslinden datmen niet ontsteken en sal: hi sal worden ghepijnt daermen laten sal in sijnre woninghe.

27

Die hemelen sullen openbaren sine quaetheit: ende die aerde sal ieghen hem opstaen.

28

Tgroeyen sijns huys sal open sijn: het sal worden

[p. *191]

neder ghetoghen inden daghe van gods gramscepen.

29

Dit is eens quaets menschen deel van gode: ende de erfachticheit sijnre woerden vanden here