Bible in duytsche (Delftse bijbel 1477)

§ Ca .xix.

1

IOb antwoerde ende seide.

2

Hoe langhe queldi mijne ziele: ende quelt mi mit uwen redenen?

3

Siet ghi bescaemt mi thienwarf: ende ghi en scaemt v niet dat ghi mij verduwet.

4

Want bin ic onwetende: so sal mine onwetenheit mit mij wesen.

5

Mer ghi verheft v ieghen mi: ende ghi berispet mi mit mijnen lachtere.

6

Verstaet doch nv dat mi god mit gherechte vonnisse niet en heuet ghequelt: ende heuet mi ontgort mit sijnen gheesellen

7

Siet ic rope om dat ic ouercracht ghedoghe ende niemant en salt horen: ic sal roepen ende nieman en is dier vonnist.

8

Hi heeft minen wech omtuynt ende ic en macher niet dore liden: ende hi heeft donckerheit gheset in mijnen pat.

9

Hi heeft mij beroeft van mijnre glorien: ende hi heeft ghenomen die crone van mijnen houede

9

Hi heeft mi allencken ghedestrueert ende ic verderue: ende hi heeft mi mine hope benomen als een boem die vte gheroot is.

11

Sijn toren is teghen mi gram ende hi heeft mij als of ic sijn viant waer

12

Sijn moerdenare sijn te gader ghecomen: ende hebben horen wech ghemaect ouer mij: ende si hebben al om en tomme mijn woninghe beleit.

13

Hi heuet mijn broeders verre van mi ghedaen: ende die mi kennen sijn van mij wech ghegaen als vreemde lude.

14

Mijn naeste hebben mi ghelaten: ende die mi kenden hebben mijns vergheten.

15

Die ingheboren mijns huys ende mijn ioncwiuen hadden hem te mi waert als tot enen vreemden: ende in hare oghen was ic als een vreemt man.

16

Ic riep mijnen knecht ende hi en antwoerde mi niet: ic bat hem seluen mit mijnen monde

17

Mijn ademen vereisde mijn wyf: ende ic bat den kinderen mijns buucs

18

Ende die sotten veronwaerden mi: ende als ic van hem ghescheiden was so spraken si quaet van mi

19

Die wilen mijn gheraders waren si hebben mi veronwaert: die ic alte sere minde. hi is mi ieghen geworden.

20

Mijn ghebeente hanghet aen mijn huut ende tfleysch is verteert: ende omtrent mijne tanden sijn allene mine lippen ghelaten.

21

Ontfermt v mijns ontfermt v mijns ghi die doch mine vrienden sijt: want sheren hant heeft mi ghenoopt.

22

Waer om queldi mi als god ende wort ghesaet van minen vleische?

23

Wie sal mi gheuen dat mijne redenen moghen worden ghescreuen? Wie mach gheuen datmense scriue in enen boec

24

mit eenre yseren griffelen of in een plate loots: of dat mense houwe mit enen beitele in enen stene?

25

Want ic weet dat mijn uerlosser leeft: ende dat ic ten achtersten daghe uerrisen sal.

26

Ende ic sal echter omcleet worden mit mijnre huut: ende in mijnen uleysche sal ic gode sien.

27

Dien ic selue sien sal: ende mine oghen sullen bescouwen: ende niet een ander. Want dese mijn hope is op gheleit in minen boseme.

28

Waer om

[p. *190]

segdi dan nv laten ons quellen: ende laet ons vinden ieghen hem een wortele van woerde?

29

Daer om vliet van des swaerts aensichte: want tswaert is wreker der quaetheit: ende ghi sult weten dat vonnisse is