Bible in duytsche (Delftse bijbel 1477)

§ Ca .xvij.

1

MIne gheest sal teder worden: mijn daghen sullen cortten: ende allene bliuet mi tgraft ouer.

2

Ic en hebbe niet ghesondicht: ende mijn oghe gheduert in bitterheden.

3

here verlost mi ende sette mi neuen dij: ende wies hant dattu wilste vechte ieghen mi.

4

Du heefste haer herte verre ghemaect van disciplinen: ende daer om en sullen si niet worden verheuen.

5

hi beloeft proeyen

[p. *188]

sinen ghesellen: ende sijnre kindere oghen sullen ghebreken.

6

Hi heeft mi gheset als in een ghemeenen bispel: ende ic bin te sijnen exempel vore hem. Mer nv bespotten mi die ioncste van tide welker vader ic niet en ghewaerdichde te setten mitten honden mijns cudden.

7

Van onwaerdicheden is mijn oghe verdonckert: ende mijn leden sijn als te nyete verdwijnt.

8

Die gherechtige sullen hier op verwonderen: ende donnosel sal worden gheporret ieghen die ypocrite

9

ende die gherechtighe sal houden sijnen wech: ende myt seer suueren handen sal hire starcheit toe doen.

10

Hier om soe keert v ghi alle ende coemt: ende ic en sal onder v luden vinden ne ghenen wijsen.

11

Mijn daghen sijn ouerleden: mijn ghepeyse sijn ghescheiden ende moeyen mijn herte

12

Si hebben den nacht inden dach verwandelt: ende na die donckerheden soe hope ic weder tlicht.

13

Op dat ic ontbeide so is die helle mijn huys: in donckerheden hebbe ic mijn bedde ghespreit.

14

Ic hebbe der vuilheit geseit du biste mijn vader: ende mijn moeder ende mijn suster seide ic den wormen.

15

Waer is dan nv mijn ontbeiden: ende wie merct mijn ghedoechsaemheit.

16

Al dat mijn is sal neder dalen in dalre diepste helle Waenstu of mi doch daer enighe ruste wisen sal?