Bible in duytsche (Delftse bijbel 1477)

§ Ca .xvi

1

ENde iob antwoerde ende seide

2

Dustane dinghen heb ic dicwile ghehoert. Ghi sijt alle lastighe vertroesters.

3

En sullen windachtighe woorden gheen eynde hebben? Oft ist dij yet moeylijc dattu spreecste?

4

Ic had oec moghen spreken ghelike dinghen den uwen. Ende oft uwe ziele voer mijne ziele waer.

5

Ende ic sonde v oec vertroesten mit redenen: ende ic soude mijn hoeft op v roeren.

6

Ic soude v starcken mit mijnen monde: ende ic soude mine lippen rueren als v te sparen Mer wat sal ic doen?

7

Spreke ic. mijn pijn en gherust niet: of swighe ic sine gaet van mi niet.

8

Want nv heeft mij mine pine verdruct: ende alle mine lede sijn te niet verdwijnt.

9

Die croken mijns vels seggen oercondscap ieghen mi: ende een valsche spreker wort gheporret ieghen mijn aensichte ende weder segghende mij.

10

Hij heeft sijnen toorne vergadert ieghen mij: ende mi dreighende so crijselde hi teghen mij mit sijnen tanden. Mijn viant heeft mi aenghesien mit eiseliken oghen

11

Si hebben op mi haer monden ondaen: veronwaerdende hebben si mijn wanghen gheslaghen: ende sijn ghesaet van minen pijnen.

12

God heeft mi besloten bi den ongherechtighen: ende hi heeft mij gheleuert der onghenadigher handen

13

Ic die wilen was so rijke ic bin haestelijc onder die voet ghetreden: hi hilt mijn necke. Hi heeft mij ghebroken: ende hi heeft hem gheset als tot enen teiken.

14

Hi heeft mi omset mit sijnen speren: hi heeft mijne lendene doerwont Hine spaerde mij niet.

15

ende hij heeft mijn inaderen op daerde wtghestort.

16

Hij heeft mi mit wonden gheslaghen op mine wonden: hi is op mi gheuallen als een gygante. Ic heb een sacke vernaeyt op mine huut ende ic hebbe mijn vleysche mit assche ouerdect.

17

Mijn aensicht is ghegheuen van ghewene: ende mijn oghen sijn verdonckert

18

Dit heb ic ghedoghet sonder quaetheit mijnre hant: als ic suuer bedinge te gode waert hadde.

19

Aerde en ouerdecte mijn bluet niet: ende mijn ropen en moet niet in di vinden stat om te sculen.

20

Want siet inden hemel is mijn oerconde: ende die mijnen wille weet is mit mi inden hoghen.

21

O mijn clapachtighe vrienden: mijn oghe drupet te gode waert.

22

Ende oft een man mocht worden gheuonnist mit gode:: also eens menschen sone gheuonnist wort mit sijnen veynoot.

23

Want siet die corte iaren liden ouer: ende ic wandele dien pat daer ic niet weder keren en sal.