Bible in duytsche (Delftse bijbel 1477)
(2008)–Anoniem Bible in duytsche (Delftse bijbel 1477)–
Auteursrechtelijk beschermd1[14:5]SMenschen daghen sijn cort: tgetal van zijnen maenden is bi di. Du heefste sijn terminen gheset die niet en sullen moghen ouerliden. | |
2[14:6]Ganc een luttel van hem dat hij rusten mach: tot dat begheerde leuen comen sal: sijn daghen sijn als eens huerknapen. | |
3[14:7]Thout heuet hope. Want houment af. het sciet weder: ende sijn telghen spruten. | |
4[14:8]Is sijn wortel veroudt in die aerde ende sijn struuc verstoruen wort int ghemul: | |
5[14:9]soe salt weder groeyen mitter verscheit vander watere: ende het sal maken een struuc als oft van eerste geplant waer. | |
6[14:10]Mer een mensche als hi doot is ende ontcleet ende verteert: ic bidde di waer is hi? | |
7[14:11]Ghelijc dat die watere wech gaen vter zee. Ende also ene riuiere die ydel worden is verdroghet: | |
8[14:12]also en sal een mensche niet weder op uerstaen als hi doot is. Hi en sal niet ontwaken voer dat die hemel versleten wort: noch opstaen van sijnen slape. | |
9[14:13]Wie sal mi dat gheuen dattu mi bedecken sulste inder hellen ende dattu mi verberghen sulste tot dat dijn gramscap ouerleden sal sijn: ende dattu mi setste tijt daer du mi in gedencken sulste? | |
10[14:14]Waenstu of een doot mensche weder leuen sal? Alle die daghe die ic nv in stride bin: so ontbeide ic tot dat mijn verwandelen comen sal. | |
11[14:15]Du sulste mij ropen: ende ic sal di antwoerden. Den werke van dijnen handen sulstu voert steken dijn rechter hant. | |
12[14:16]Want du heefste mijn screden ghetelt: mer spare mijn sonden. | |
13[14:17]Du heefste mijne misdade gheteykent als in enen sacke: mer du heefste mijne quaetheit ghenesen. | |
14[14:18]Die vallende berch sciet henen: ende die stene wort ouerghedraghen van sijnre stat. | |
15[14:19]Die watere holen die stene: ende mit oueruloede soe minret die aerde allencken: ende du sulste die menschen also oec verliesen. | |
16[14:20]Du heefsten een luttel verstijft: op dat hi ewelijc gaen soude. Du sulste sijn aensicht verwandelen: ende sulsten wtsenden. | |
17[14:21]Weder sijn kinder edel sijn sullen ofte onedel: hine sals niet verstaen. | |
18[14:22]Nochtan als sijn vleysche leuet so sal hi droeue sijn: ende sijn siel sal op hem seluen wenen. |
|