Bible in duytsche (Delftse bijbel 1477)

§ Ca .xiij.

1

SIet mine oghen heuet alle dinc ghesien ende mine ore heeftse ghehoert ende ic heb elc verstaen.

2

Ende na v conste so bekenne ic oec: ende ic en bin niet nederre dan ghi sijt.

3

Mer nochtan sal ic ten almachtighen spreken: ende ic beghere mit gode te disputeren:

4

ende teerste wil ic v toghen dat ghij sijt visieres van loghenen ende oeffenarren van verkeerder leringhe.

5

Ende of ghi sweghet: dat men wanen mochte dat ghi wijs waert

6

Daer om hoert mijne berispinghen: ende verstaet tsonnisse van minen lippen

7

Heuet god uwer loghenen te doen: dat ghi loosheden ouer hem spreken sult?

8

Neemdi niet sijn aensichte vte: ende pijndi v ouer gode te vonnissen?

9

Of salt hem ghenoechlijc sijn diemen niet verberghen en mach: oft sal hi worden bedroghen als een mensche mit uwe loesheden?

10

Hi sal v berispen: want int heimelijc en roecti sijns aensichts niet.

11

Thant als hi hem berueren sal so sal hi v storen: ende sijn anxte sal op v vallen.

12

V ghedencken sal gherekent worden mitten asschen: ende uwe necken sullen in modder verwandelt worden.

13

Swiget een luttel: dat ic spreken mach wat mi therte raet.

14

Waer om score ic mijn vleysche mit mijnen tanden: ende draghe mine ziele in mijnen handen?

15

Al doot hi mij oec: nochtan sal ic in hem hopen. Mer nochtant sal ic mijn weghe in sijn aenscouwen berispen:

16

ende hi sal mijn verlosser wesen. Want en gheen ypocrijt en sal in sijn aenscouwen comen.

17

Hoert mijne redene: ende mijn bijspele verstaet mit uwen oren.

18

Worde ic gheuonnist: ic wete dat ic gherecht sal worden vonden.

19

Wie ist dat mit mij sal worden verdoemt? Hi come. Waer om worde ic al swighende verteert?

20

Twe dinghen allene en doet mi niet: ende dan en sal ic van dijnen aensicht niet worden verborghen.

21

Doch dijn hant verre van mi: ende dinen anxte en moet mi niet veruaren.

22

Roep mij ende ic sal dij antwoerden: ofte seker ic sal spreken. Antwoerde du mij.

23

Hoe vele quaetheden ende sonden heb ic: toghe mi mine misdade ende mine sonden?

24

Waer om berchstu dijn aensicht: ende waenste mi wesen dijnen viant.

25

Ieghen een blat dat mitten winden gedreuen wort toghestu dijne macht: ende du ueruolchste een droghe stoppele.

26

Want du scriueste ieghen mi bitterheden: ende du wilste mij veteren inden sonden

[p. *185]

mijnre ioncheit.

27

Du heueste mijnen voet in enen stoc ghedaen: ende du heefste alle mijn pade gewacht: ende du heefste ghemerket die voetstappen mijnre voeten.

28

Ende ic sal worden verteert als een vulicheit: ende als een cleet dat ghegheten wort van den motten.

29[14:1]

Die mensche die gheboren wort vanden wiue corten tijt leuende: so wort hi veruolt mit vele keytiuicheden.

30[14:2]

Hi comt vte als een blome ende breect: ende vliet als een scaduwe: ende nemmermeer en gheduert hi in ene state.

31[14:3]

Ende du waerdichmaecste dattu op dustane dinc dijn oghen ondoetste ende dattune mitti leides in vonnisse?

32[14:4]

Wie mach suuer maken dien die van onsuueren sade ghewonnen is? Ende doetstuut niet die allene bist?