Bible in duytsche (Delftse bijbel 1477)

§ Ca .xij.

1

IOb antwoerde ende seide

2

So sidi dan allene menschen: ende sal die wijsheit mit v op rijsen?

3

Ende ic heb oec een herte als ghi doet: ende ic en bin niet nederre dan ghi sijt. Want wie en weet niet dat ghi weet?

4

Wie wort bespot van sijnen vrient also ic doe: hi sal god anropen ende hi sallen ghehoren.

5

Want men bespot des gherechts simpelheit: een lichtese dat behouden wort inder riker ghepeyse: bereet ten ghesetten tide.

6

Der rouers woninghe sijn oueruloeyende: ende sij vertoernen gode stoutelijc ter gramscapen als hijt hem al in handen ghegheuen heuet.

7

Hier om soe vrageden vee ende het sal di leren: ende die voghelen des hemels ende si sullent di wisen.

8

Spreect der aerden toe ende si sal di antwoerden: ende die visschen vander zee sullent dij vertellen.

9

Wie twiuelt dat sheren hant al dit ghemaect heuet?

10

In wies hant is die ziele van elken leuenden: ende smenschen gheest van allen vleysche

11

Ende onderscheit die ore die woerden niet: ende eens menschen kinnebacken die smaec vander spijsen?

12

Inden ouders is wijsheit: ende in vele tijts die vruetscap.

13

Mit hem is wijsheit ende starcheit: hi heeft den raet ende verstandenisse.

14

Op dat hi breect. niemant en is die maect: ende besluut hi enen menshe. niemant en is dien ontsluut.

15

Ist dat hi twater onthout so sal alle dinc verdroghen: ende sent hi twater wt soe salt die aerde omwerpen.

16

Mit hem is starcheit ende wijsheit. Ende hi kent den ghenen die bedrieghet: ende den ghenen die bedroghen wort.

17

Hi brenghet den raetgheuers tot enen sotten einde: ende den rechters in verwonderen.

18

Hi breect der coninghen gordelelen: ende gort haer lendenen bouen mit eenre coerden.

19

Hij

[p. *184]

brenghet die papen te oneeren:ende hij vertredet die voerbarighe.

20

Ende verwandelt der warigher lippe: ende doet wech der ouders leringhen.

21

Hi stort vte versmaetheit optie princen: ende hi verlicht die ghene die tonder waren

22

Die openbaert die diepheit vander donckerheden: ende brenghet int lichte die scaduwe der doot.

23

Die de lude menichfoudicht ende verderftse: ende die verderft sijn brenghet hij weder ghehele ten eersten state

24

Die verwandelt svolcs vanden lande princen herte: ende hi bedriechtse dat si te vergheefs gaen moeten doer die onghetreden wech.

25

Sij sullen tasten als in donckerheden ende niet in lichte: ende hi salse doen dolen als dronckene.