Bible in duytsche (Delftse bijbel 1477)

§ Ca .xi.

1

ENde sophor van naamath antwoerde ende seide.

2

Die gene die vele spreket en sal hi oec niet horen: ofte sal een clappachtich man daer mede gherechtich worden?

3

Sullen di alleen die mensche swighen: ende alstu die ander bespottes en sulstu van niemant bescaemt worden?

4

Want du heefste gheseit. Mijn reden is suuer ende ic bin reyn in dijnen aenscouwen.

5

Ende oft god mitti sprake ende hi sine lippen di op dade:

6

om di te toghen die verholentheden der wijsheit. ende dat sijne wet menichfoudich waer: ende du verstontste dat du vele min heissches van hem dan dijne quaetheit verdient.

7

Machschien sulstu gods voetstappe begripen: ende du sulste di vinden totten volmaecten almachtighen?

8

Hi is hogher dan den hemel. Ende wat sulstu doen?

[p. *183]

Hi is dieper dan die helle: ende waer bi sulstuut bekennen:

9

sijn mate is langher dan die aerde: ende wider dan die zee.

10

Ofte hijt al ommekeerde of tot enen hope vergaderde wie sal hem wedersegghen?

11

Want hi bekent der menschen ydelheit: ende als hi die quaetheit siet ende en merct hijt niet.

12

Ene ydel man verheft hem in houerde: ende hi waent dat hij als vri gheboren is als ene wilt ezels volen.

13

Mer du heefste dijn herte verstijft ende heueste dijne hande te hem waert wt ghesteken.

14

Doetstu die quaetheit die in dijn hant is van di. ende en blijft in dijn woninghe en ghene ongherechticheit:

15

dan sulstu mogen dijn aensicht opheffen sonder smette: ende du sulste ghestadich wesen ende di niet ontsien.

16

Du snlste oec der kaytiuicheden vergheten: ende du sulster ghedencken als water dat verbi leden is:

17

ende hi sal opti risen des auonts als die claerheit van middaghe. Ende alstu wanen sulste dattu al verteert sijtste soe sulstu risen als die dachsterre:

18

ende du sulste betrouwen hebben mitter hopen die vore di gheset is: ende ontgrauen sulstu sekerlijc slapen.

19

Du sulste rusten ende nyemant en sal sijn die di veruaren sal: ende vele luden sullen dijn aensichte bidden.

20

Mer der quader oghen sullen ghebreken: ende alle toeuluchte sal van hem vlyen: ende haer hope is tferonwaerden der zielen