Bible in duytsche (Delftse bijbel 1477)

§ Ca .x.

1

Mijnre zielen verdriet mijns leuens ic sal ieghen mi laten mijne sprake. Ic sal spreken in die bitterheit mijnre zielen:

2

ic sal gode segghen: en wil mi niet verdomen. Seg mi: waer om dattu mij dus verdoemste?

3

Ende dencket

[p. *182]

di niet guet oftu mi quelste ende verduwetste. twerc dijnre hande: ende du der quader raet helpes?

4

En sijn dij niet vleyschelike oghen. ofte sietstu oec als een mensche siet?

5

Ende en sijn dijn dagen niet eens ghelijc eens menschen dagen ende sijn dijn iaren ghelijc menscheliken tiden:

6

dattu soecste mijn quaetheit ende mine sonde ondersoecste?

7

Ende du weten mogheste dat ic niet quaets ghedaen en hebbe: als niemant en is die van dijnre hant verlossen mach

8

Dine handen maecten mij. ende sciepen mi al om en tomme: ende werpste mi dus haestelijc auerechte.

9

Ghedencke bid ic dattu mi ghemaect heefste als modder: ende dattu mi weder in ghemulle brenghen sulste.

10

En heefstu mij niet ghemolken als melke: ende heefstu mij te gader doen ronnen als case?

11

Du heefste mij ghecleet mit hude ende mit vleische: ende du heefte mi vergadert mit been ende mit zenuwen.

12

Du heefste mi ghegheuen leuen. ende ontfermicheit: ende dijn visiteringhe heeft minen gheest behuet.

13

Al verberchstu dit in dijnre herten: nochtan weet ic dattu alles ghedencste.

14

Oft ic ghesondicht heb ende du mi een vre ghespaert heefste: waer om en laetstu mij niet suuer blijuen van mijnre quaetheit?

15

Ende bin ic quaet: so is mij wee. ende bin ic gherechte soe en sal ic mijn hoeft niet op heffen: so bin ic veruolt van vernoye ende van kaytiuicheden.

16

Ende om die houaerde sulstu mi vaen als een leeuwinne: ende als ic weder gekeert bin so tormente mi wonderlike.

17

Du vernyeweste dijn oerconde ieghen mi: ende die pijnen verwenden teghen mi: ende du menicfoudichste dijn gramscap ieghen mi.

18

Waer om brachtstu wt mijnre moeder vroulicheit mi Ende ofte ict verteert waer: dat mi ghene oghe en sage.

19

So soude ic hebben geweest of ic niet en waer: vanden buke te graue waert ghedraghen sijn.

20

Ende sal die luttelheit van mijnen daghen niet cortesijc einden? Daer om laet mij dat ic mijnen rouwe een luttel verwenen mach

21

eer ic gaen sal ende niet weder keren ten donckerachtighen lande. dat ouerdect is mitten donckerheden der doot:

22

ten lande van kaytiuicheden ende van donckerheden: daer is die scade der doot ende en ghene ordinancie. mer daer woent ewelijc eyschelijcheit binnen.