Bible in duytsche (Delftse bijbel 1477)

§ Ca .viij

1

BAldad van suich antwoerde ende seide.

2

Hoe langhe sulstu dustanighe dingen spreken: ende hoe langhe sal menichfoudich wesen die gheest der redene dijns monts?

3

Vertredet god tfonnisse: ende verkeert dalmachtighe dat gherecht is?

4

Al wast oec dat hem dijn kinderen misdaen hadden ende hijse gelaten heeft in die hant haerre quatheit:

5

nochtant op dattu vroech tot gode opstaetste ende du den almachtighen bidste:

6

op dattu suuer ende gherechtich voert tijtste soe sal hij te hant te dijwaert ontwaken: ende hi sal vredelijc maken die woninghe dijnre gherechticheit:

7

in so vele al hebben dijn eerste cleyne gheweest: so sullen dijne achterste alte sere worden ghemenichfoudicht.

8

Want vraghe deerste gheslachte ende ondersoeke naerstelijc dat vanden ghedencken.

9

want wi sijn van ghisteren ende en bekennens niet. Want ghelijc ene scaduwe sijn onse daghen bouen der aerden:

10

si sullen di leren: ende si sullen di spreken: ende si sullen wt hare harten hare sprake voert brenghen.

11

Mach lyes wassen sonder wacheit: of mach biese wassen sonder watere?

12

Alst noch is inder blomen ende ment niet en trect mitter hant. soe verdroghet voer alle crude.

13

Aldus sijn alder gheenre weghe die gods vergheten: ende een ypocrijs hope sal veruaren.

14

Hem en sal niet ghenoghen sijn weecharticheit: ende sine betrouwen is ghelijc spinnen webbe.

15

Hi sal louen op sijn huys ende en sal niet staen: hi salt ondersette ende salt niet risen op

16

Men siet die wacheit eer die sonne comt: ende in haer oprisen soe comt haer groeyen wt.

17

Op een hope stenen sullen hare wortelen worden dicke: ende si sullen bliuen tusschen den stene.

18

Op dat sijse versleghet van hare stat: soe sal sij lochenen sijns ende sal segghen. Ic en kenne di niet.

19

Want dits die bliscap van haren weghe: dat van aerde echter ander groeyen

20

God en sal den simpelen niet verwerpen: noch sijn hant bieden den quaden:

21

voer dat hi veruolt sal hebben dijnen mont mit lachen. ende dijn lippen mit vroechden:

22

die dij haten sullen ghecleet worden mit scanden: ende der quader woninghe en blijuet niet staende.