Bible in duytsche (Delftse bijbel 1477)

Capittel .vij.

1

EEns mensche leuen is ene ridderscap optie werelt. ende sijn daghen sijn als huerknapen daghen.

2

Ghelijc dat een hertte begheert die scaduwe ende ghelijc dat een huerknaep wachte deinde van sijn werke:

3

also heb ic oec ghehad ydel maenden: ende ic heb mij ghetelt pijnlike nachten.

4

Als ic slapen sal so seg ic wanneer sal ic opstaen: ende ic sal weder ontbeiden den auont: ende ic sal veruolt worden mit pijnen totten donckerheden.

5

Mijn vleysche heeft aenghedaen vuylheit ende smetten van ghemulle: mijn huut is verdroghet ende te gader vercrompen.

6

Mijn daghen sijn haesteliker ouerleden dan een stucke linenlakens afghesneden wort van enen weuer: ende si sijn verteert sonder enighe hope.

7

Ghedenc want mijn leuen wint is: ende dat mijn oghe niet wederkeren en sal guet te sien:

8

ende des menschen sien en sal mi niet aenscouwen Dijn oghen sien ieghen mi: ende ic en sal niet gheduren.

9

Ghelijc dat een wolke vergaet ende ouerlijt. also en sal niet opcomen die ter hellen neder ghegaen is:

10

noch hi en sal niet wederkeren in sijn huys: ende sijn stat en sallen voert niet meer bekennen.

11

Hier om en sal ic oec mijnen mont niet sparen: ic sal spreken inden vernoye mijns gheestes: ic sal callen mitter bitterheit mijnre zielen.

12

Bin ic niet die zee ofte enighe vergaderinghe volcs wanttu mi omuaen heefste mit enen kerkere?

13

Seg ic dat mi mijn bedde vertroesten sal. ende dat ic verlicht worden sal mit mi seluen sprekende op mijn bedde:

14

sulstu mij veruaren mit drome: ende du sulste mi bestoten mit anxte bi visioen.

15

Om dese sake heeft mine zile verhangen te worden vercoren: ende mijn beenre die doot.

16

Ic bin in wanhope gheuallen. Ic en sal nv niet langher leuen. Spare mij here: want mijn daghen en sijn niet.

17

Wat is die mensche dattune verhefste: of dattu ieghen hem dijn herte soecste?

18

Du vysiteersten vroech: ende du proefsten haestelike.

19

Hoe langhe en spaerstu mi niet: noch en laetste mi dat ic mijn spekel verswelghen mach?

20

Ic heb gesondicht. Wat sal ic di doen o wachter der menschen? Waer om heefstu mi werdersporich ieghen di gheset: ende

[p. *180]

ic bin mi seluen swaer geworden?

21

Waer om en doetstu mine sonde niet wech ende waer om en doetstu mijne quaetheit niet of? Sich ic sal nv slapen in ghemulle: ende is dattu mij vroech soecste so en sal ic niet blijuen staende