Bible in duytsche (Delftse bijbel 1477)

§ Ca .v.

1

ROop dan oft yemant is die dij antwoerde: ende bekere di tot enighen vanden heilighen

2

Enen sotten man doet sine gramscap. ende den clenen doot sine hatye.

3

Ic sach den sotte mit vaster wortelen: ende te hant vloecte ic sijn schoenheit.

4

Sine kinderen sullen verre wesen van salicheden: ende sullen worden verduwet in die poorte: ende niemant en sal wesen diese verlossen sal.

5

Sinen oeste sal die hongherighe eten: ende een ghewapende sallen vaen: ende die dorstighe sullen drincken sine rijcheden.

6

Niet en gheschiet in die werlt sonder sake: ende en groeyt vander aerde gheen droefheit

7

Die mensche wort gheboren tot arbeit: ende die voghele te vlieghen

8

Om dese sake sal ic den here bidden: ende ic sal mine sprake setten te minen gode waert.

9

Die grote dinghen doet ende onbegripelike: ende wonder sonder getal.

10

Die reghen gheeft opt aensicht der aerden: ende diet al veruersschet mit watere.

11

Ende die die oetmoedige settet int hoghe: ende die droeue verheft mit ghesontheden.

12

Die verstroyt der quader ghepense: so dat haer handen niet voldoen en moghen dat si beghinnen.

13

Die de wise begrijpt in hare vroetheit: ende die scheit der quader raet

14

Sdaghes sullen si in donckerheden comen: ende te middage sullen si tasten. als oft nacht waer

15

Hi sal den maten verlossen vanden swaerde haers monts: ende den armen van ondadigher hant.

16

Ende den maten sal hope wesen: mer die quaetheit sal haren mont te gader trecken.

17

Salich is die mensche die vanden here berispt wort. Daer om en lachtert des heren berispen niet:

18

want hi wont ende gheneest: hi slaet ende sijn handen sullent ghenesen.

19

Hi sal di verlossen van ses vernoeyen: ende inden seuenden en sal di ghene quaet ghenaken.

20

Inden hongher

[p. *178]

sal hi di verlossen vander doot: ende inden strijt van des swaerts hant.

21

Du sulste worden verborgen vander gheesellen der ongherechtigher tonghen: ende du en sulste die ellendicheit niet ontsien als si coemt.

22

In woestinghe ende hongher sulstu lachen: ende die besten der aerden en sulstu niet bescamen.

23

Mer dine sekerheit sal sijn mitten stenen van den lantscepen: ende die beesten vanden lande sullen di vredelijc wesen.

24

Ende du sulste weten dat dine woninghe vrede sal hebben: ende du sulste niet sondighen dine ghedaenten vysi terende

25

Dus sulste oec weten dat dine saet menichfoudich wesen sal: ende dijne gheslachte ghelijc den crude vander aerden

26

Du sulste in oueruloedicheden gaen in dijnen graue: also men inbrenghet een hoep tarwen in haren tiden.

27

Sich also wij dit ondersocht hebben: also ist. Ende nv alstuut ghehoert hebste so bepenst in dinen ghedachte.