Bible in duytsche (Delftse bijbel 1477)

§ Capittel .ij.

1

ENde het gheuiel op enen dach als gods kinderen comen waren. ende voer den here stonden: dat sathan oec onder hem gecomen was. ende dat hi in sheren aenscouwen stont:

2

dat doe die here seide tot sathan. Wanen coemstu? Hi antwoerde ende seide. Ic heb tlant omgaen: ende doerwandelt.

3

Ende die here seide tot sathan en heefstu niet ghemerct iob mijnen knecht dat sijns ghelijc niet en is binnen den lande. een simpel man ende gherechte ende gode ontsiende. ende hem wachtende van quade: ende die noch sine onnoselheit onthout? mer du heueste mij ieghen hem verporret: dat icken om niet quellen soude.

4

Sathan antwoerde hem ende seide. Vel omme vel: ende dat een mensche heuet sal hij gheuen ouer sijne zyele.

5

Hier om stec voert dijn hant ende nope sine bene ende sijn vleysche: ende dan sulstu sien of hi di int aensichte ghebenedien sal.

6

Hier om seide die here tot sathan. Sich hi is in dijn hant: nochtan houde sine ziele.

7

Dus ghinc sathan wt van des heren aensichte. ende sloech iob mit alte quaden sweren: vanden hole van sijnen voeten totten toppe van sijnen houede.

8

Ende hij sat in vule missche. ende scrapte dat of mit enen scarue.

9

Ende sijn wijf seide hem. Gheduerstu noch in dijnre simpelheit? Ghebenedie gode ende sterf.

10

Ende hi seide tot haer Du heefste ghesproken als een vanden sotten wijuen. Of wij goet ontfaen hebben van sheren hant: waer om en sullen wij tquade niet ghedoghen? In al desen en sondichde iob mit al sijnen lippen niet.

11

Als iobs drie vrienden hoerden alt quaet dat hem gheschiet was. eliphas van theman. ende baldad van suich. ende sophar van naamath: soe quam elc van sijnre stat. Want si hadden ouer een ghedraghen: dat si te gader comen souden ende visiteren ende troestenen.

12

Ende doe si van verre haer oghen op gheheuen hadden: so en bekenden sijs niet. Ende sij riepen ende weenden: ende scoerden haer clederen ende werpen ghemul op haer hoeft inden hemel

13

Ende si saten mit hem op die aerde seuen daghen ende seuen nachten: ende nyemant en sprac een woort van hem. Want si saghen die pijne alte swaer wesen.