Bible in duytsche (Delftse bijbel 1477)

§ Ca .I

1

EEn man was int lant hus die iob hiet. Ende die man was simpel ende gerechte ende gode ontsiende: ende hi wachte hem van quade.

2

Ende hem worden

[p. *174]

gheboren seuen sonen: ende drie dochteren.

3

Ende sine possessie was seuen dusent scapen. ende drie dusent kemels: vijf hondert iocke ossen ende vijf hondert ezelinnen: ende seer vele huysghesins Ende die man was groot onder alle die van orienten.

4

Ende sijn sonen ghinghen ende maecten werscepen tot haren husen: elc in haren daghen. Ende si stonden ende riepen haer drie susteren: dat si drincken souden ende eten mit hem luden.

5

Ende als die daghe der werscepen al omme ouerquamen. so sende iob tot hem ende heilichdese: ende hi stont vroech op ende offerde holocauste. Want hi seide Oft machschien mijn kinder ghesondicht hebben: ende benedien gode in haerre hertten. Aldus dede iob tot allen daghen.

6

Ende op enen dach doe gods kinder comen waren. om voer den here te staen: so was oec onder hem luden sathan.

7

Ende die here seide tot hem Wanen coemstu? Hi antwoerde ende seide Ic heb tlant al omme ghegaen: ende doerwandelt.

8

Ende die here seide tot hem. En heefstu niet ghemerct iob minen knechte dat sijns ghelijc int lant niet en is: die ene simpel man is ende gherechte ende gode ontsiende ende hem van allen quaden wachtende?

9

Ende sathan antwoerde hem ende seide. Ontsiet iob gode te vergheefs?

10

En hebstu niet omsettet sijn huys: ende al sijn goet al om en tomme? Ende du heueste ghebenedijt die werken van sijnen handen ende sine possessie is ghewassen int lant

11

Mer steec een luttel dijn hant voert ende nope al dat hi besittet: op dat hij dij int aensicht niet en ghebenedijt.

12

Hier om seide die here tot sathan Sich al dat hi heeft is in dijn hant: mer an hem en doch dijn hant niet. Ende sathan ghinc wt van sheren aensichte.

13

Op enen dach doe sijn sonen ende sijn dochteren aten ende droncken wijn: in haers eerste gheborens broeders huys:

14

soe quam ene bode tot iob ende zeide. Die ossen ackerden ende die ezellinnen weyden daer beneuen:

15

ende die van saba quamen op ende nament al. ende si versloeghen die kinderen mitten zwaerde: ende ic bin alleen ontgaen om dat ict di boetscappen soude.

16

Doe dese noch sprac: so quam een ander ende seide. Gods vuere viel van den hemel: ende verbrande alle die scape ende die kinder: ende ic bin alleen ontuloghen om dat ict di boetscappen soude.

17

Mer doe die oec noch sprac: quam een ander ende seide. Die caldeeusche maecten drie battaelgen. ende si namen die kemelen ende voerdense wech. ende si versloeghe die kinder mitten zwaerde: ende ic bin allene outuloghen om dat ict dij boetscappen soude.

18

Noch sprac die: ende siet daer quam een ander ende seide. Daer dijn sonen ende dijn dochteren aten ende droncken wijn. in haers eerstgheboren broeders huys:

19

so quam haestelijc een anxtelike wint vlieghende vter wildernisse: ende hi stiet die vier hoerneke vanden huse neder: ende het viel ende verperste dine kinderen ende si sijn doot: ende ic bin allene ontuloghen om dat ict dij boetscappen soude

20

Doe stont iob op. ende scoerde sijne cleder: ende scoer sijn hoeft ende viel neder

[p. *175]

op die aerde.

21

ende seide ende aenbede. Ic quam naect wt mijnre moeder: ende ic sal naect weder darwaert keren. Die here gaft die here naemt: alsoet den here ghenoghede also ist ghesciet: des heren name moet sijn ghebenedijt.

22

In alle desen en sondichde iob mit alle sine lippen niet: noch en sprac niet sots teghen gode.