Bible in duytsche (Delftse bijbel 1477)

§ Ca .xv.

1

ENde hi gheboet hester dat was sonder twiuel mardocheus. dat si tot den coninc ingaen soude: ende dat sij bidden soude ouer haer volc ende ouer haer lantscap.

2

Want hi seide ghedencke die daghe dijnre cleynheit. hoe du gheuoet biste in mijn hant: want aman danderde manne na den coninc heeft ieghen ons ghesproken in die doot:

3

ende aenrope du den here. ende spreect den coninc ouer ons. ende verlosse ons vander doot. Ende oeck dese die hem ondergheset sijn.

4

Ende ten derden daghe dede hester af die cleder daer si in verciert was: ende si dede haer glorie an.

5

Ende doe si blicte mitten conincliken ghewaden ende sij aengheropen hadde gode den here ende den behouder van allen dinghen: so nam si twe ioncwiuen mit haer.

6

ende optie ene leendese als of si van weeldicheden. ende van groter tederheden haren lichame niet en had moghen draghen:

7

mer tander ioncwijf volghede haerre ioncfrouwen ende hielt haer clederen achter op. die optie aerde sleepten

8

mer mit haren roden roseliken aensichte. ende mit bequame

[p. *172]

blickenden oghen bedecte haer droue harte: ende mit groter anxte beuaen was

9

Ende doe si dus alle die doren bi ordinancien doreleden was soe stont si ieghen den coninc. daer hi sat opten trone van sinen rike. ghecleet mitten conincliken clederen blickende van goude ende van preciosen stenen: ende hi was veruaerlijc aen te sien.

10

Ende doe hij sijn aensichte op gheheuen hadde ende hi mit barnende oghen mit gramscapen sijn herte ghetoent hadde. soe viele die coninghinne ende haer verwe wort in bleecheden verwandelt. ende si liet haer amachtich hoeft vallen op haer ioncwijf.

11

Ende god verkeerde sconincs gheest in sachtmoedicheden: ende hi haeste hem van vresen ende spranc van sinen trone ende hieltse in sijnen arme tot dat si bequam: ende smeectese mit desen woerden.

12

Hester wat heefste? Ic bin dijn broeder: en wil niet ontsien

13

Du en sulste niet steruen. Want dese wet en is niet ghemaect om dinen wille: mer om alle dander lude.

14

Com herwert ende taste die ruede

15

Ende om dat si sweech. soe nam hi die gulden ruede ende leidse op haren halse ende si cussedse ende hi seide. Waer om en spreecti ieghen mi niet?

16

Si antwoerde Ic sach di here ghelijc gods enghele: ende mijn herte wort veruaert om die vrese dijnre glorien.

17

want here du biste te verwonderen: ende dijn aensichte is vol bequaemheden.

18

Ende doe sij sprac soe viele si achter: ende bleef wel na doot

19

ende die coninc wort bedroeft: ende al sijn knapen troestene.

Dit is die exempel vander letteren die artarxerses die coninc sant tot alden prouincien van sijnen rike ouer die ioden: ende dit en heeftmen oec niet in hebreeusche.