Bible in duytsche (Delftse bijbel 1477)

§ Ca .xvi.

1

ARtarxerses die grote coninc van indyen tot ethiophien. Alle die prouincien ende rechters. die onse ghebode onderdaen sijn: ontbiet hi saluut.

2

Vele luden hebben dicwijl in houaerden misbesicht der princen doecht ende die ere die si hem ghdaen hebben:

3

niet allene en pijnden si hem te verduwene die onder den coninc sijn: mer si en mochten niet verdraghen die glorie die hem ghegheuen is

4

Ende si en houden hem niet ghepaeyt dat si niet danckelijc en sijn vanden weldaden die men hem doet. ende dat si in hem seluen breken menschelijc rechte: mer si micken dat si gods sentenci ontulien sullen die alle dingen siet

5

Ende sijn ouerbrokich geworden in so groter sotternyen. dat si hem pijnen mit haerre gheueinsder logenen auerechte te werpene die ghene die haren dienste die hem beuolen is naerstelijc doen. soe dat si alle prijs waerdich sijn:

6

om dat si hem pinen mit behendigher loesheit der simpelre princen oren te bedrieghen om dat si wanen dat si van hare nature sijn.

7

Ende dese dinc proeftmen wt ouden gesten. ende wt dien datmen daghelijcs doet: hoemen mit quaden raden eenrehande coninghen wilen verquaet.

8

Waer bi dat te versien is den paeys van allen den prouincien.

9

Ende ghi en sult niet wanen al beuelen wi menigherhande dinc dat dic comt vter lichtheit onser herten: mer wij gheuen sentencie nader

[p. *173]

oerbaerre ende die noot vanden tiden. alsoet die ghemene oerbare heysschet

10

Ende om dat ghijt claerlike verstaen sult dat wij segghen. aman amadathi soon van harten ende van volke griex ende vreemde ende van diere van persen bloede. die onser goedertierenheit mit sijnre felheit besmet heeft. hi was vreemde van ons ontfaen:

11

ende hi proefde onse trouwe so groot in hem datmen onse vader hiet. ende dat hi wort van allen luden aenbeet danderde man naden coninc:

12

ende hi wort in so grote houaerde verheuen: dat hi hem pijnde om te rouen vanden rike vanden leuene.

13

Want mardocheum bi wies trouwe dat wi leuen ende hester der ghesellinnen van onser rijc. mit al haren volke die pijnde hi ter doot te brenghen mit eenrehande nyewe ende onghehoerde versieringhe.

14

Ende hi peysde dit. had hi die doot gesleghen dat hi spien soude na onse rijc ende dat hi trike van presen ouerdraghen soude ten griecken.

15

Mer wij en hebben ne ghene misdaet geuonden inden ioden. die de quaetste mensche die nyewert ter doot ghewijst en heeft: mer wederkeert so hebben wi geuonden dat sij gherechte wet houden

16

ende dat si sijn kinderen des alre oppersten ende meeste gods die altoes leeft. Bi wies weldaden onse vaderen. ende ons trike ghegheuen is ende tot huden wortet ons ghehouden.

17

Waer bi dat gi weten sult dattie letteren die hi onder onsen name sant te nyete sijn.

18

Ende om die misdaet soe hanghet hi. die dit versiert heeft. ende al sijn maechscip an galghen gehangen vore die poorte van deser stat dat is te susis: niet dat wi hem gegouden hebben dat hi verdiende in god.

19

Mer dit vonnisse dat wij nv senden dat sal men voertsetten in allen poorten. daer die ioden moghen houden haer wet:

20

ende ghi sult hem wesen te salcoerse dat si moghen dootslaen al die ghene die hem bereit hadden die ioden te doden Ia opten derthiensten dach vander twaelfster maent adar.

21

Want dalmachtighe god verwandelde hem desen dach der droefheit ende tghewene in blijscepen

22

Ende daer bi suldi desen dach hebben onder dandere heilighe daghe. ende vieren mit alre blijscepen: soe datmen hier namaels weten mach

23

dat alle die ghene die ghetrouwelijc die van persen onderdaen sijn dat si ouer hare ghetrouheit gewarighe loon ontfaen. Ende die trike verraden wil dat sij verderft worden ouer die misdaet.

24

Want elke stat ende prouincie die niet deelachtich en wil wesen aen dese feeste si moet verderft worden mitten zwaerde ende mitten vuere: ende si moet ghedestruert worden. datter nemmermeer beeste moch mensche in en wone: ende te enen exempel der onwaerdicheit ende der onghehoersaemheit

Hier gaet wt hesters boec