Bible in duytsche (Delftse bijbel 1477)

§ Capittel .xiij.

1

ARtarxerses die grote coninc allen sijnen princen ende sijnen baronen van indien tot ethiophen van hondert ende seuen ende twintich prouincien die sijn gheboden onderdaen sijn. ontbiet hi saluyt.

2

Om dat ic here bin ende ghebot hebbe ouer vele luden. ende ic alle die werelt onder mine machte gedaen hebbe: soe en wil ic ghenesins ghebruken die grootheit mijnre moghentheit mer ic beghere die onder mij sijn te beleidene mit goedertierenhede ende salicheit: om dat si sonder enighe anxte al swighende haer leuen ouerliden souden. ende ghebruken paeys. dien alle sterflike luden begheren.

3

Ende doe ic van mynen rade vragede hoe ic dit soude mogen voldoen: soe was ene die in wijsheden ende in trouwe bouen dandere was. ende hi was danderde naden coninc die aman hiet.

4

ende hi seide mij dat al die werelt dore eenrehande volc was ghestroeyt dat niewe wet hielt: ende dat ieghen alre luden gewoenten dede. ende des conincs gebode veronwaerde. ende datmen mit sijn gescille brake die eendrachticheit van alden nacien.

5

Als ic dit ghehoert hadde. ende ic sach dat een volc rebelle was ieghen allen gheslachten der menschen ende dattet verkeerde wet hielt. ende het ghinc ieghen ons gheboden. ende het scoerde den paeys ende die eendrachticheit van alle den lande die ons sijn:

6

so beualen wi datmen al die ghene die aman beuelen sal die prouoest is bouen allen prouincien ende danderde man na den coninc. ende dien wij eer doen in onse vaderstat. moeten worden dootghesleghen mit wijuen ende mit kynderen van haren vianden. ende men ontferme nyemant van hem luden. ia opten veerthiensten dach der twaelster maent adar van desen iare.

7

op dattie quade luden op enen dach ter hellen nederclimmende sij onsen rijc den paeys laten. dien

[p. *170]

sij verstoerden.

Tot hier toe is die exempel vander letteren dat hier volghet. vant iheronimus bescreuen na die stat daer hester staet ende mardocheus ghinc ende dede al dat hem hester beuolen had Ende van gheen van allen den interpreterers en wort geseit: mer dit en heeft men in hebreusche niet.

8

Ende mardocheus badt den here: ende ghedachte al sijnre werke.

9

ende seide. Here here almachtich coninc. want in dijnre moghentheit sijn alle dinc gheset: ende niemant en is die steeken mach ieghen dijnen wille: op dattu israhel micste te versoenen.

10

Du makeste hemel ende aerde ende soe wat dat binnen der rontheit des hemels is:

11

du biste here van allen. ende niemant en is die ieghen dijnre moghentheit steeken mach.

12

Du weetste alle dinc ende du weetste dat ic om houerde ofte om lachter ofte om enighe begheerte van glorien dit niet en dede. dat ic den houaerdighen aman niet en aenbede:

13

want ic had oec gaerne ghereet gheweest om israhels salicheit te cussene die voetscap sijnre voeten:

14

mer ic ontsach mij dat ic mijns gods ere ouerdragen soude tenen mensche. mer dat ic niemant aenbeden en soude sonder den here mijnen god

15

Ende nv here coninc abrahams god ontferme dijns volcs: want onse vianden willen ons verliesen: ende dinc erfachticheit afdoen.

16

ende veronwaerden dine paertye niet: die du verloste wt egipten.

17

Ghehore mine bede ende wes goedertieren dinen dele ende dijnre maten: ende verkere onse ghewene in blijscepen. dat wij leuende dijnen name moeten benedien here: ende en beslute der gheenre monde niet. die di louen.

18

Ende al israhel riep mit dustaenre harten. ende bedinghen oec anden here: om dat hem die seker doot ane quam