Bible in duytsche (Delftse bijbel 1477)

§ Capit .xi.

1

INden vierden iare doe ptholomeus ende cleopatra regneerden. sy brochten dositheus die seide dat hi pape was ende van leuijs gheslachte. ende ptholomeus sijn soon dese lettere van phurim: ende si seiden datse Iysimachus ptholomeus soon wtgetoghen had vten hebreeuschen. in die stat iheurusalem. ende dit was tbeghinne in die ghemene translacie: ende men vindet oec in hebreeusche niet noch van genen interpreterers en wort gheseit.

2

Int anderde iaer als die grote artarxerces regneerde opten eersten dach vander maent nisan: soe sach mardocheus iairs soon semey soons die cis sone was wt beniamins geslachte een drome.

3

ene man ene iode die in die poorte van susis woende: ene grote man. ende onder die eerste vander conincliker zalen.

4

Ende hi was vanden ghetale die geuanghene die nabugodonosor die coninc van babilonien ouergheuoert hadde van iherusalem mit yeconia den coninc van iuda:

5

ende dit was sijn drome. Het openbaerde lude ende gheruchte. ende donreslaghe ende grote aertbeuinghe ende verstoernisse opt lant:

6

ende siet twe grote draken deen ieghen dander bereet ten stride:

7

ende mit haren gherope worden alle nacien beruert. dat si vechten souden ieghen der gherechtigher lude.

8

Ende die dach was vol donckerheden ende vresen: ende tribulacien ende vernoys: ende grote anxte optie werelt.

9

Ende der gherechtigher lude worden ghestoert die haer quatheit onsaghen: ende die ghereet waren ter doot.

10

Ende sij riepen totten here: ende doe si riepen so wies ene cleyne fonteyne in ene grote riuiere: ende vloeyde in vele wateren

11

Tlicht ende die sonne resen ende die oetmoedighe worden verheuen: ende verslinde die voerbarighe.

12

Als dit mardocheus ghesien had ende hi van sinen bedde ghestaen was. so pensde hi wat

[p. *169]

god doen woude. ende hi hadt vaste in sijn herte ende begheerde te weten wat die drome beteikenen soude