Bible in duytsche (Delftse bijbel 1477)

§ Ca .x.

1

ASsuerus die coninc maecte al tlant ende al die eylande vander zee eygen ende onder tribuyt:

2

ende sijn stracheit ende sijn moghentheit ende sijn waerdicheit ende sijn hoecheit daer hi mardocheum mede verhief sijn bescreuen inden boken van meden ende van persen:

3

ende hoe mardocheus die vander ioden geslachte was danderde was na assuere den coninc ende grote onder die ioden ende ontfanclijc den luyden van sijnen broeders: die guet sochten sijnen volke: ende die sprac dat behoerlijc was. te payse van sijnen gheslachte. Al dat van hesters boec in hebreeusche is dats hier wt. Mer dat hier na volcht vant iheronimus in die ghemene translacie die in griexe bescreuen is: ende daer en binnen na teynde vanden boke so wort dit capittel gheseit twelcke wij nae onse ghewoente mit een strepe gheteykent hebben.

4

Ende mardocheus seide. Dese dinghen sijn

[p. *168]

van gode gedaen.

5

Ic ghedencke dies droems dien ic sach die dit selue beteykende: ende niet daer of en bleef te nyete.

6

Die cleyne fonteine die wyes in ene ryuiere ende die verkeerde in ene lichte ende in die sonne. ende wederkeerde oueruloeyende in vele watere Dits hester. Die den coninc te wijue nam ende woude dat sij coninghinne waer

7

Mer die twe draken: dat bin ic ende aman

8

Die luden die vergadert waren : dat sijn die ghene die hem pijnden der ioden name af te doen.

9

Mer mijn luden sijn israhel die doe totten here riepen: ende die here maecte sijn volc behouden: ende verloste ons van allen quaden. ende dede grote teykene ende wonder ouer die heydene:

10

ende hij beual twe lotte te wesene. dene gods volke. ende dander alden anderen heydenen.

11

Ende beide die lotten quamen ten ghesetten daghe te hant. van dien tide alle die heidene voer gode: ende den here ontfermes:

12

ende die here ghedacht sijns volcs sijnre erfachticheit.

13

Ende men sal dese dagen houden in die maent ader inden veerthiensten ende vijfthiensten daghe vander seluer maent: mit alder aernsticheit ende blijscappen daer tvolc in een vergadert wort: hier na in allen gheslachten des volcs van israhel