Bible in duytsche (Delftse bijbel 1477)

§ Capittel .ix.

1

OPten dertiensten dach vander twaelfster maent die wi gheseit hebben dat ader heet. Alsmen dus ghereide alle die yoden doot te slaen ende haer vyanden spieden na haer bloet soe begonsten wederkeert die ioden bouen te sijn: ende hem te wreken van haer vianden.

2

Ende si vergaderden in allen steden. ende poorten ende dorpen. om dat si hem setten souden ieghen haer vianden diese doden wilden. Ende niemant en dorste wederstaen: om dat alrehande volc ontsach hem van hare machte

3

Want alle die rechters ende princen ende procureres. ende elc die macht had inden prouincien in elke stat of in elke werc. si verhieuen die ioden om die vrese mardocheo:

4

dien si wisten dat prince was vanden pallayse ende dat hi vele vermochte. Ende die nieumare van sinen name wies oec daghelijcs: ende wentelde in alre luden mont.

5

Ende aldus sloghen die ioden haer vianden mit groter plaghen ende sloghense doot. ende gouden hem dat si hem luden hadden ghemict te doen:

6

ia dat si oec binnen susis vijf hondert man dootsloghen:

[p. *166]

al sonder thien amans der ioden viants sonen vanden welken dit die mannen sijn

7

pharsandathan ende delphon ende esphata

8

ende phorata ende adalia ende aridatha

9

ende ephermescha ende arisai ende aridai ende vaysatha.

10

Ende doe sijse doot ghesleghen hadden: soe wouden sijn ghenen roef doen van haren goede.

11

Ende te hant wort tghetal die in susis doot ghesleghen waren bracht totten coninc

12

Ende hi seide totter coninghinnen. Die ioden hebben in die poort van susis vijf hondert mans doot gheslaghen. ende ander thien amans sonen. Hoe groten dootslach waenstu dat si doen in allen den prouincien? Wat heysschestu mere: ende wat wilstu dat ic beuele te doen?

13

Ende hester antwoerde. Op dattet den coninc lief is so gheue men machte den ioden dat si morghen in susis moghe doen also si huden ghedaen hebben: ende men hanghe die thien amans sonen an galghen.

14

Ende die coninc beual datmen also doen soude. Ende te hant ginc vonnisse in susen: ende men hinc amans thien sonen.

15

Ende die ioden vergaderden opten veertiensten dach vander maent ader ende si sloghen drie hondert man doot in susis: ende men nam hem haer goet niet:

16

mer die ioden stonden oec voer haer zielen in alle den prouincien die onder den coninc assuerus waren ende sloghen hare vianden ende nauolghers doot ia so sere dat si vijf ende tseuentich dusent man doden: ende niemant en nam niet van haren goede.

17

Mer die derthienste dach vander maent ader was eenen dach der dootslachte onder hem allen: ende opten veerthiensten dach hielden si op doot te slaen. Ende si ordineerden datmen desen dach vieren soude: ende dat si voertmere te desen daghe hem gheuen souden te maeltiden te bliscepen ende ter werscepen.

18

Mer die ghene die in die poort susis hem ter slacht gauen si waren die derthienste ende den veerthiensten dach van deser maent veronledicht: mer in desen vijfthiensten dach hieldense op te slaen. Ende daer om soe maecten si dien dach feestelijc van werscepen ende van bliscepen.

19

Mer die ioden die in onghemuerden poorten ende dorpen woenden. si ordineerden vanden veerthiensten dage der maent ader te werscepen soe dat sij daer in verblyden moeten. ende moeten deen den anderen gherechten senden van v werscepen ende van spisen.

20

Ende mardocheus screef al dit: ende in letteren gemaect soe sant hijt tot den ioden die woenden in al sconincs pruincien: beide die verre ende bi woenden:

21

dat si ouer feeste ontfaen souden den veerthiensten ende den vijfthiensten dach vander maent ader ende dat sijse altoes als dat iaer omme comt mit feesteliker eren vieren sullen:

22

want in desen daghen wraken hem die ioden ouer haren vianden. ende haer ghewene ende sericheit worden verwandelt in bliscepen ende in vruechden: ende dat dese dage wesen souden van werscepen ende bliscepen: ende dat si onderlinghe senden gherechten van spisen: ende dat si den armen ghiften gheuen souden.

23

Ende die ioden ontfnighen in feesteliker ghewoenten al dat si te

[p. *167]

dien tiden begonsten te doen: ende twelcke mardocheus mit sijne brieuen gheboden hadde te doen:

24

want aman amadathi soon van agags gheslachte der ioden aduersarus ende viant hi peysde ieghen hem quaet. dat hijse doden soude ende te nyete maken: ende warpe phur dat in onse tonghe ludet loth:

25

ende hier na ghinc hester tottten coninc in: ende bad dat amans quaetheit met sconincs lettere te niete souden worden ghemaect: ende dat quaet dat hi ieghen die ioden pensede keren soude op sijn hoeft. Want hem ende sine sonen nagelde hi ant cruce:

26

ende van dien tide worden dese daghe gheheten phurim dat bediet der loth: om dat phur. dat is tlot in ene canne gheworpen was. Ende al datter ghedaen was is bescreuen inden letteren ende volumenne van desen boec ende al dat sij ghedoechden. ende dat voert mere verwandelt is. >

27

dat ontfinghen die ioden: op hem ende op haer saet. ende op al die ghene die in haer wet sullen willen comen: dat nyemant en sal moghen dese twee daghen ouerliden sonder feeste diet ghescrifte oercond: ende sekeren tijt hebben telke iaere dat coemt Dit sijn die dagen dat nemmermere verghetenheit afdoen sal.

28

ende alle die prouincien ende alle die werelt dore sullen se vieren in allen gheslachten: want ne ghene stat en is daermen die daghe phurim dats der loth niet en hout van den ioden: ende van haren gheslachten die te desen oefeninghen verbonden sijn.

29

Ende hester abyhers dochter die coninghinne ende mardocheus screuen ene andere lettere: datmen desen dach soude ordineren feestelijc te wesen ewelijc hier na mit allen arensten.

30

Ende si sendense tot allen den ioden die woenden inden hondert ende seuen ende twintich prouiocien. onder den coninc assuerus: dat si paeys hebben souden ende ontfaen die waerheit.

31

ende houden dien dach van lotten: ende dat si en vieren souden te sinen tide mit bliscepen: alsoet mardocheus ende hester gheordineert hadden Ende si ontfinghense te houdene van hem ende van haren sade vastene ende gherope ende die daghen vanden lotten:

32

ende alle datmen in desen boec diemen heet hester ghescreuen is