Bible in duytsche (Delftse bijbel 1477)

§ Capittel .viij.

1

IN dien daghen gaf die coninc assuerus hester der coninghinne amans huys der ioden wederpertye: ende mardocheus quam in vore sconincs aensichte. Want hester had gheseit dat haer oem was:

2

ende die coninc nam tfingherlinc dat hi had beuolen van aman weder te nemene: ende hi gaft mardocheo. Ende hester settede mardocheum bouen haer huys.

3

Ende hier mede en was si niet ghepayt mer si viele voer sconincs voeten: ende si weende ende sprac te hem ende bat dat hi beuelen soude te nyete te blijnen amans van agags gheslachte quaetheit ende sijn alte quade versieringhen die hi ghepeynst hadde ieghen die ioden:

4

ende die coninc stac voert sijn septrum also hij ghewone was: daer hi mede thoende een teiken der goedertierenheit.

5

Ende sij sont op ende stont voer hem ende seide. Op dat het den coninc ghenoecht ende op dat ic gracie gevonden heb vore sijn oghen ende op dat hem denct dat mijn bede hem niet contrarie en is: soe bidde ic datmen mit niewen litteren beteren amans oude lietteren die verradere ende viant der ioden was. mit welken litteren hijse had beuolen te dodene in alle sconincs prouincie.

6

Want hoe sal ic moghen ghedoghen die doot ende die dootslach van minen volke?

7

Ende die coninc assuerus antwoerde der coninghinne hester ende mardocheo den iode. Ic heb hester gheleuert amans huys ende hem heb ic doen naghelen an een cruce: om dat hi so coene was dat hi sijn hant wtstac ieghen die ioden.

8

Daer om scrijf den ioden wt sconincs name alsoet v ghenoghet: ende teikent die letter mit minen vingherline. Want die castume was: dat niemant en dorste segghen ieghen die letteren die wt sconincs name ghesonden waren ende die mit sijnen uingherline gheteikent waren.

9

Ende men ontboet sconincs scriueyne ende sinen liberarise. want het was doen ter tijt vander derder maent diemen siban heet opten drie ende twintichsten dach van deser maent soe screefmen die letteren also mardocheus woude totten ioden

[p. *165]

ende totten princen ende procuruers. ende rechters die ouer hondert seuen ende twintich prouincien regierden. die waren van inden tot ethiophien: prouincien ende prouincien. volke ende volke. na haren tonghen ende letteren. ende den ioden: also sijse horen mochten ende lesen.

10

Ende die letteren diemen wt sconincs name sant. waren gheteikent mit sinen vingherline ende men santse mitten metsagiers: die tot allen prouincen lopen souden. ende die mit niewe boetscappen vore doude comen souden.

11

Ende die coninc beual hem. dat si die ioden souden doen vergaderen in elke stat. ende dat si hem beuelen souden te vergaderen in enen hoep. om te staen ouer haer ziele: ende dat sij doot slaen souden ende afdoen al haer vianden mit hare wijuen mit kinderen ende mit al haren husen.

12

Ende men sette alle die prouincie dore enen dach van deser wraken. dat was die dertiensten dach vander twaelfster maent ader.

13

Ende dit was die sinne vander letteren datmen kenlijc doen soude in allen landen ende volke die onder den coninc assuerus waren: dattie ioden ghereet souden wesen om wrake te nemen van haren vianden.

14

Ende die messagiers toghen wt haestelike bootscap te draghen: ende sconincs vonnisse ghinc in susis.

15

Ende mardocheus quam vten pallayse ende van vore sconincs aensichte blickende mit sconincliken clederen dat was mit blaeuwen ende mit gheluwen: ende hi droech ene guldene crone opt hoeft ende hi had om enen ziden purpuren mantel. Ende al die stat verblide ende was vrolic.

16

Ende men sach den ioden een niewe lichte verrisen: vrochde. ende eere. ende bliscap.

17

Onder alle volc ende in allen poorten ende prouincien daer sconincs ghebot quam. daer was wonderlike blijscap ende feestelijc dach: also groot dat vele heydene ende secten. hare wet lieten ende gauen hem te ioden waert ende te haren oefeninghen. Want grote vrese gaf allen luden vander ioden name.