Bible in duytsche (Delftse bijbel 1477)

§ Ca .vij

1

Aldus ghinc die coninc ende aman ter werscap dat si mitter coninghinnen drincken souden.

2

Ende sander daghes seyde haer die coninck oec als hij vanden wijne verwarmt was. Hester wat is dijn heyssche datmen di gheue: ende wat wilt du ghedaen hebben? Ist oec dattu half mijn rijc heyste du sulstet hebben

3

Ende si antwoerde hem. O coninc of ic gracie voer dijnen oghen geuonden hebbe ende of het di ghenogehet: soe ghef mijne ziele daer ic ouer bidde: ende mijn volc daer ik ouer bidde.

4

Want wij sijn gheleuert ic ende mijn volc: datmen ons verderuen sal ende datmen ons doden sal ende te niet maken. Ende vergaue god datmen ons vercochte in knechte ende in ioncwijue soe waert quaet te verdraghen ende al suchtende soude ic swighen mer nv is ene onse viant wies felheit wederkeert inden coninc.

5

Ende die coninc assuerus antwoerde ende seide. Wie is dese ende van wat machte: dat hi dit der doen.

6

ENde hester seide. Onse viant ende onse alre quaetste wedersake is dese aman. Ende doe aman dit hoerde soe worde hi te hant veruaert: ende en mochte niet ghedoghen te aensien sconincs aensichte ende der coninghinnen.

7

Ende die coninc stont gram op. ende ghinc vander stat der werscepen ende ghinc inden boemgaert die mit bomen gheset was ENde aman stont oec op om dat hi der

[p. *164]

conninghinnen hester bidden soude ouer sine ziele: want hi verstont dat hem vanden coninc quaet bereet was

8

Ende doe die coninc wederkeerde wt den boemgaerde die mit bomen geset was ende weder quam in die stede des werscaps. so vant hi dat aman op sijn bedde gheuallen lach daer hester op lach Ende hi seide. Hi wil die coninghinne oec vercrachten daer ic ieghenwoerdich bin in mijn huys. Ende noch en was sconincs woort wt sijnen monde niet gegaen: ende si ouerdecte te hant sijn aensichte.

9

Ende arbona ene vanden ghelubden camerlinghen die in sconincs dienste stonde seide. Siet een hout dat aman bereet had te mardocheus behoef die ouer die coninc ghesproken heeft staet in amans huys. ende het is vijftich cubitus hoghe. Ende die coninc seide. Hancter aman selue an.

10

Ende aldus wort aman ghehanghen aen die galghe die hi te mardocheus behoef ghemaect had: ende sconincs gramscap gheruste.