Bible in duytsche (Delftse bijbel 1477)

§ Capit .vi

1

Aman genoechde desen raet: ende hi beual een hoghe cruce te ghereidne. Ende die coninc leet dien nacht ouer sonder slapen: ende hi dede hem brenghen die historien ende die gheschieten vanden tiden die leden waren. Ende doemense vore hem las:

2

soe quamen sij te diere stat daer ghescreuen was hoe mardocheus gheboetscapt had bagathans ende thares der camerlinghen verranenisse: die den coninc assuerum begheerden te doden.

3

Ende doe die coninc dat ghehoert had so seide hi. Wat ere ende wat loene heeft mardocheus ontfaen ouer dese trouwe? Ende sijn knapen ende sijn dieninghen seiden. Hij en heeft niet ontfaen.

4

Ende thant seide die coninc. wie is int vrijthof? Want aman was comen int binnenste vrijthof. om den coninc te radene dat hi mardocheum beuelen soude te naghelen an die galghe die te sijnen behoef bereet was.

5

Ende die knapen antwoerden. Aman staet int vrijthof. Ende die coninc seide. Hi come in.

6

Ende doe hi in ghecomen was so seide hem die coninc. Wat salmen dien man doen die

[p. *163]

den coninc begeert ere te doen? Ende aman peysde in sijn herte ende micte dat die coninc niemant el en woude eren sonder hem.

7

Ende hi antwoerde. Dien man die den coninck begheert ere te doen

8

dien salmen cleden mitten conincliker clederen ende men sallen setten opt paert daer die coninc op pleghet te ridene ende hi sal die coninclike crone ontfaen op sijn hoeft:

9

ende die eerste van sconincs princen ende van sijnen tyrannen sal sijn paert houden: ende hi sal die strate vander stat dore gaen ende ropen ende segghen Dus sal hi worden gheeert: die den coninc ere doen wil.

10

Ende die coninc seide hem. Haeste di: ende nem een behaghel cleet ende een paert ende doch alsoestu geseit heueste mardocheo die iode die sittet voer die poorte vanden pallayse Ende wachte dattu niet achter en laetste van dattu ghesproken heefste.

11

Ende aldus nam aman behaghel cledere ende een paert: ende hi clede mardocheum ende setten opt paert ende hi ghinc vore hem in die strate vander stat ende riep. Deser eeren is hi waerdich: soe wie die coninc wil ere doen.

12

Ende mardocheus keerde weder vore die poorte vanden pallayse: ende aman haeste hem thuyswaert drouende. mit ouerdecten houede

13

ende hi vertelde sares sijnen wiue ende sijn vrienden al dat hem gheuallen was Ende die vroede die hij tot sijnen rade had ende zares sijn wijf antwoerde hem Ist mardocheus daer du dore bist beghinnen te vallen vanden ioden zade so en sulstu niet wederstaen moghen: mer du sulste vallen in sijn aenscouwen.

14

Als sij noch saten ende spraken soe quamen sconincs camerlinghen: ende daden haestelic comen ter werscap waert die die coninghinne hester gereit hadde